يقول من يبدأ سلام وتحايا= للحاضرين السامعين المجاليس
يالابتي خوذو علوم ووصايا = من واحدٍ يقرأ بكل القواميس
ويكتب حروفٍ بالمعاني ملايا =سبك الذهب ماهو بحبر وقراطيس
ناديتهن بين الضلوع الحنايا = وتواردن من فكر راسي مرا ميس
وادليت في كل الموارد رشايا= وارسلت في كل المواطن عواسيس
لقيت لي ناسٍ تحث المطايا = ولقيت لي ناسٍ تدق النواقيس
واقول لكم ياطيبين السجايا = يالابتي ياكاسبين النواميس
الى متى وحنا نتنخى طنايا = الى متى وحنا نتنخى سناعيس
راح التنخي مابقي له بقايا= راح ومضى وقت العيال المطاويس
راحت علوم عبيد وهاكالبرايا= ابن رشيد مؤسس الحكم تأسيس
وابن علي شيخ الجبل القرايا= والصديد والجربا وغضبان ونعيس
والحثربي وفنيخ وأخو المعايا= والربع والتمياط والقعيط ومنيس
وكثير ناسٍ ماتجيلي على آيا =والقاف يحكمني على آيا وعلى ايس
راحوا من الدنيا وبقية حكايا= وابقوا لنا علوم الفخر والنواميس
ومن بعدهم لازم نسوي سوايا= شيئاً لحاضرنا وللنشأ تدريس
يالابتي وصوا للأقصى وصايا= نبي ا جتماعٍ نأسس الرأي تأسيس
نبي اجتماعٍ فيه ندرس قضايا= ماهو (حُكم) صندوق لأجل المفاليس
صندوق خيري لاجل ناس حفايا= وتحديد مهرٍ للشباب المعاريس
ونحدد العانات هي والعطايا= وننظر بوضع المعسرين المحابيس
ونسعى لحل المعضلات البلايا= ونجعل لنا بالعرف حد ومقاييس
وايضا بعد ننظر بأمور خزايا= ندري بها لاشك سكته وتدليس
وبعض النساء ياناس شبه العرايا= بفستان حفلة عرس يلعب به بليس
كنه من اللي يطلعن بالدعايا= وإلآ من اللي يذكرن يم باريس
وين الرجال اللي تقود السرايا= وين الرجال اللي تحل اللواليس
ان قلت راحوا مطوعين السبايا= حنا بعد فينا رجالٍ أشاويس
ادري بهم والامر مابه خفايا= وادري بهم بسود الليالي مدابيس
وكلٍ بصدره مثل صدري نوايا= لكن تروا نحتاج للجهد تكريس
والساس تحتاجه كبار البانايا= ولا ينبني بنيٍ على غير تأسيس
وصلاة ربي عد نبت الشغايا= وعداد ماهبت هبوب النسانيس
على الذي يشفع لكل البرايا= بيومٍ عظيم ٍييبس الريق تيـبّيس