قصيدة للشاعر الكبير



مفرح جاعد وسمي الضمني المهلكي الصعيبي العبدلي المطيري رحمه الله وغفر له وأسكنه الجنة

أنـا رفيقـي مـا أسـمـع الـلـي حكـابـه =لـو جاتنـا منـه السـوالـف مضـاريـع
اقــرا مفاهيـمـه واحـســب حـسـابـه =واشـوف مدخـال الـقـدم والمطالـيـع
مانـي عجـول بالـزعـل فــي غيـابـه =قدام ما أسمع منه ما أعطـي ولا أبيـع
لاخـيــر فـــي رفـقــة بـلـيـا حـبـابـه =ولا خير في جمع القلوب المواجيع
ورفـيـقـك الـغـالـي تـحـمـل عـتـابـه =واحـلـم علـيـه إلـيـا دفعـتـه دوافـيـع
شــيــع ثــنــاه ولا تـبــيــن عـيــابـه =عــاره يـعـورك يابـعـيـد المـرامـيـع
وان كـان دون مرافقـك صــك بـابـه =لقـه قفـاك وخـل مشيـك مـع الـريـع
خـلـه عـلـى بـعـدك يـسـرح ركـابـه =يقضي سنة والا شهـورن وأسابيـع
وإليـا طلبـك الصلـح يـا مرحـبـا بــه =سهـل طريـقـه لايـجـي لــه موانـيـع
واحفـظ لسانـك عنـه واستـر جنـابه =لاتجـرحـه بـيـن الـذيـاب المجـاويـع
تـــرى الـلـســان مـلـكــع يـنـدعـابـه =مثل الحصان اللي يبي لـه مصاريـع
واجعـل علـى هــرج تقـولـه رقـابـة =عقـل يصـرف طايشـات المواضـيـع
والصمت في بعض المجالس مهابـة =يكفيـك شـر اهــل الفـمـي اللواسـيـع
عـن كلمتـن يقضـب خطاهـا قضابـة =يركض عليها مصنع الهـرج تصنيـع
خـلـه يــروح ومــنــك خــال جــرابـه =يرجع كما المفلـس بسـوق المطاميـع
واحـفـظ صـداقـة طيـبـيـن الـقـرابـة =ربعـك إليـا قـلـت علـيـك المشـاريـع
سيـف نهـار الضيـق تقضـب نصابـه =ياقـاك مـن حـدب السيـوف البواتيـع
وإلـيـا جـفـاك الــدار مـالـك ومـابـه =رزقك على اللي طوع الكون تطويع
ممشـاك فـي حــزم تـطـارد سـرابـه =أخيـر مـن شـوف الوجيـه المدانـيـع
خطـو الرخـوم مصاحبـيـن الخيـابـة =تـجـار هــرج وبالـلـوازم كـراسـيـع
الرجـل مـثـل الـذيـب رزقــه نهـابـة =ياخـذ مـع الـدو الـخـلاوي قراطـيـع
والطيـب ضلـعـن زاميـاتـن هضـابـه =للريـح فـي شـامـخ ركـونـه ذعـاذيـع
عسـر المراقـي يتعـب الـلـي رقـابـه =مـا ياكـره كــود الـحـرار القواطـيـع
والا الــردى جــرف هـيـال تـرابــه =حـوله لـزهـران المقـافـي مـرابـيـع
يرقـد بـه الحصني ويلـقـا الـذرابـــــة =والبـوم بيـن غصـون قشعـه مواقيـع
رجـل علـى النامـوس بـيـض ثيـابـه =ورحـل يرقعهـا علـى المتـن ترقـيـع
ورجــل يـزايـم علـتـه مــن عـذابــه =عـيــدان نـــاره لـلـقـريـب مـوالـيــع
عـلـى الجمـاعـة كــل يــوم طـلابـــة =خـمـاش وجــه لا لـقـي بــه منافـيـع
ورجـل مـع الأيـام مــا ينصـخـا بــه =عـز الرفيـق إليـا صفعـتـه صوافـيـع
غيـث علـى مـن جـاه يمطـر سحابـه =عشبه علـى روس النوابـي مفاقـيـع
ورجل سوات الليث عطـب صوابــــه =مـن دون حقـه سنـع الخصـم تسنيـع
طيـب وعصـمان الـشـوارب تهـابـه =يرجـا وتخشـاه الرجـال الصعاصيـع
ومـن لا درى بالنـاس محـدن درابـه =مالـه علـى سـجـل النشـامـا تواقـيـع
ومـن لا يحـوش النعـم بـأول شبـابـه =في شيبته يحسب حساب الرواضيـع
وختامـهـا ذكــر النـبـي والصـحـابـة =واستغفر اللي مـا يضيـع ولا يضيـع