مثل الجبل ما هزٍني قالٍ او قيل=ما دمت اميٍز هامتي من رجولي
ابعد عن دروب الخفاف المهابيل=ولا يهمن هرج كل امهبولي
وان خاطبن عاقل سليل المشاكيل=آقف واهللٍي به وانوٍخ ذلولي
اعطيه من راسي علوم وتفاصيل=وآخذ علومه وابتعد عن فضولي
ولد العرب لاصار ما ينطح الشيل=ولا يعرف المرجله والاصولي
ولا بهًر الدله وحاف المعاميل=وليمته جبنه ولبنه وفولي
وخٍر عنه يا علْ دربه تساهيل=من شان يبعد لايصول اويجولي
من كلمةٍ تعرف نصوف الرجاجيل=ومن كلمتٍ يعرف سليل الفحولي
كبر الجهامه ماتهنا به الفيل=لاسمعتٍ زينه ولا زين زولي
طير الرخم يدبك بليا محاصيل=يخاف من ظله رعاعٍ جفولي
والصقر له سمعه وهيْبه وتبجيل=لا ضاع صاب اللي يهدٌه ذهولي
خشم الجمل يفْرق كثيرٍ عن الذيل=البشت حشمه والردى للنعولي
زين الرجل لاصار عاقل وحلحيل=يعجبك لامن صار فعلٍ وقولي
ياويل حالي ويل ويلن على ويل=هذا الزمن شاهدت شيٍ يهولي
شفت الهمج ما تعرف الجدي وسهيل=يضيع لو عمره ثلاثين حولي
ويبدا يصيح اليا امطرت واقبل السيل=يشكي على ربعه يقول افزعوا لي
خطوه بخطوه لا تعدون با الحيل=وليا مشوا خطوه يقول اوقفوا لي
(الدلة اللي ما تبهر من الهيل)=ما تشربه غير السلق والعجولي