قالوا رومانسي قلت فعلاً رومانسي=قلبي خضر والترف بالحيل عناه
أبو خدودٍ كنها اشراق شمسي=وكن القمر متمركزٍ في محيَّاه
وعيونه اللي تسرق القلب نعسي. =والشعر الأشقر فوق الأمتان غطَّاه
كل الحلا مغموس بالزين غمسي=في ناظري ماشفت مثله وحلياه
ياحمس قلبي من هوى الزين حمسي=كنه على جمر الغظى حيل يصلاه
من دون خلي ياهل الحب رمسي=الدار البيضاء تحتضن كل مأواه
وانا هنا في وسط نخلي وغرسي =في دار ابو فهد عسى الرب يحماه
أمن وأمان وراعي الشر منسي=بارض الوطن ياباغي الخير تلقاه
لكن هويت الزين من تلك نفسي=حبه سكن بالقلب وتله من اقصاه
قلبي على عرش المحبه بكرسي=متربِّع والبال عايش بذكراه
أصبح على ذكراه ياناس وامسي=يفز قلبي كل ماحل طرياه
وبنت الوطن في زينها طب ضرسي=لكن ذبحني العطش من على ماه
تقول ابي شابٍ وجيبٍ وجمسي=واللي متزوج ياهل العرف ماابغاه
ياطايرة الميق بالجو ارسي=وخلي تجاهك صوب خلٍ هويناه