ياحمود هل رمضان وزل مـا كنّـه=الادقايق يخيفـك ركـض الازمانـي
قمت اتذكر وجـال بضامـري ونّـه =دنيا تقلّـب علينـا اشكـال والوانـي
تغيّـرت مـا بقـى بسلومهـا سنـه = غدره تبيّن علينـا شـوف الاعيانـي
طيبه "تنكّر"على الاجواد- بـه منّـه =والغيث لو هل ما ربّـع بالاوطانـي
الخيّـر اللـي يصالـي هيلـه وبنّـه = صكّت عليه العضود بحـر الاكوانـي
سـود الليالـي بـلا رحمـه توطنّـه = قام يتلزّى "غبـن " لفـلان وفلانـي
والجاهل اللي نسيهـا ضاحـكٍ سنّـه =هلباج يدلـه ولا حسّـب للاحزانـي
لابـد الايـام بالـغـرّات يفجـنّـه =يمسي حسيـرٍ وبالمخـراج بحلانـي
ياحمود مرباعها يشكـي مـن الكنّـه =والعفن يحسب"قهر" من روس الاعياني
الحر حوّل مـن المرقـاب " للعنّـه " =والتيس الاصبح نسي هدّات سرحانـي
دنيـاك تبـرم دوالببـه ولـه حنّـه =يسره بعسره وزوده صار نقصانـي
لاشك نرجي مدير الفلـك مـا عنّـه =علام غيبه وما يرجـى ومـا كانـي