هات القلم وأيضا من الطرس قرطاس=وشطر القصيد, العجز يأتي مقاسه
واكتب لمنهو حاز طيبٍ ونو ماس=طيبٍ قديمٍ من على ساس ساسه
رجلٍ أديب وللأدب منه نبراس=يا حل بالمجلس يطيّر عماسه
سوالفه تبعد عنك كل هوجاس=يدخل على المجلس سرور وناسه
من لابةٍ يوم انها سيوف وافراس=كل المراجل فايزينن بكاسه
أولاد الأزمل للعدو سم وعماس=افخر بهم والكل يفخر بناسه
ياماجد الضوي تمعنت بالناس=ومن التجارب صار عندي فراسه
وجربت بعض الناس خوّة ومجلاس=فيهم دواء للجرح من طيب باسه
لقيت انا العالم له اشكال واجناس=واخذت من كثر التجارب دراسه
لقيت ناسٍ عنده شعور واحساس=ولقيت ناسٍ به غرور وخساسه
ولقيت ناسٍ عرفم يرفع الرأس=ولقيت ناسٍ طايحٍ مابراسه
ولقيت ناسٍ هرجهم وزن وقياس=ولقيت ناسٍ هرجهم به نحاسه
وناسٍ سوالفهم كما عقود الألماس=وناسٍ سوالفهم مهارش بساسه
وبعض البشر الله مشقيه بالناس=شره على الغايب يفصّل قياسه
يحلله من اخمص قدميه للراس=حكي القفا في شرع طبعه وناسه
وعلى المغالط دائماً يضر س اضراس=يقول لك عني ويطق راسه
السالفة ياجابها مصدره واس=حطّاب ظلما مايتدرّا بفاسه
أما يجيك بهرجةٍ مالها ساس=وإلا تعرض للمسولف وحاسه
هذا وأنا مانا وكيلٍ على الناس=ولآبي على العالم شموخ ورياسه

حي الجواب عداد ماهب نسناس=وعد النهار وعد مظلم دماسه
من ابوفهد الضيغمي طيب الباس=عسى الولي ينجيه من سو باسه
من لابةٍ عرضه نزيه من الادناس=سلالة طهاره ماذكر به نجاسه
ويالضيغمي انتم هل الفوز بالكاس=من لابة لكم بشمر رياسه
وكنتم ولازلتم لكم وزن وقياس=وتاج الفخر يزها الضياغم لباسه
وقايع التاريخ تكتب بقرطاس=بخزاين اسطنبول عليه حراسه
ولو ماهرجنا ياسطم تدري الناس=مخبورٍ اللي صار مابه دساسه
ويومنها بالرمح والدرع والطاس=كم فارسٍ جبتوا سلاحه وطاسه
بالمعركة خلوه بالدم محتاس=مثل ماقالوا فجّ راسه بفاسه
للخلد من تجند بسيف عباس=ومن لاامتثل رايه بالأقدام داسه
اخو عبيد اللي علي الضد مدباس= شهوده بجلده والعدو قص راسه
وعينه وراه ومصممٍ عقب مرواس= يرجع ويعالج مسببات التعاسه
ومن قو عزمه مادخل قلبه الياس=ومبدا المناضل مايسكّر قياسه
وبغير حايل ماتهنى بمجلاس=رجع وهدّ ى من براسه شراسه
ودانت لأخو نورة عقب شق الأنفاس=عن الميل عدّلها وبأمره تواسه
وياما بها داسوا على كل منداس=ياما صفت بالسيف ماهي بلاسه
ومدحك لنا ياشوق من تزهى الألاباس=خلاني اشعر بالفخر والحماسه
وقصيدتك تبعد عن النفس وسواس=تشفي غليل اللي بكبده يباسه
ويابو فهد ذكرت طيّب وهلاس= وذكرت ناسٍ مزعجتكم حساسه
مثلك نعاني ياسطم كيد الأنجاس=الله يكفينا شر من به نجاسه
ياكثر من شوفه يغثك وتنحاس= لكن تبي صبرٍ و تبي سياسه
وصلوا عدد اشراق شمسٍ والإدماس= علي النبي الهاشمي خير ناسه