أعوذ برب الناس من ضيقة البال= والهم والوسواس والفقر والدين
وأعوذ به من كل حاقد ودجال =من الحَسَد و النفس والسحر والعين
واعوذ به من الغم والبخل بالمال=ومن الكسل و الحزن ومن الشياطين
واعوذ به من كل مايقهر الحال = قهر الرجال و شر جور السلاطين
واعوذ به من أرذل العمر ياطال = عمرن تعــوذ منه ســيد المصـلــين
وياللـــه يا عــلاّم بأســـرار الأحوال=يامنـــزلٍ عمــى0 وطــــه 0 وياسـين
ظلّن بظلّك يوم ماغيرك ظلال= واغفر ذنوبي يــوم وزن المــــوازين
انا ومن امّن على قولي وقال= رجواك يارب الضعوف المساكين
وجميع عبدٍ له على بابك آمال= قريب وإلا من اهل الهند والصين
يالآدمي مادام في عمرك امهال = اغنـم ترى أيّـام الفتى بس يومين
يومٍ تعدّى وسجلن فيه الاعمال=باللي عملته من عمل زين أوشين
واليوم هــذا باقيٍ مابعد زال= ولا لـك على باكـر ضمانٍ وتأمين
احذر من التسويف وبعاد الآمال=الموت تره اسرع من ارماشة العين
جهّز معاميل السفر ترك رحّال= لابد من يومن عن الدار مقفين
كثّر زهابك وأربط العفش بحبال= وجهّز رفيقٍ للسفر مذهبه زين
لاهو ولد عمك ولاهو ولد خال= لكنه انفع لك من الربع الأدنين
يبقى معك في عودة المال وعيال= رفيق وافي من خيار الوفيين
وارفع يديك لمن لنا فيه الآمال= اللي خلقْكْ بأول الخلق من طين
هذا وصلى الله على سيد بلال = اعداد ما يلبّى الحجيج الملبين