حي الجواب اللي حروفه ظريفه=ويعيش من صاغ المعاني وقاله
تبي تعرف ويش السبب ياخليفه=قولك جـوادي قاصـرٍ له حباله
هـذا ان قلبي من القلوب النظيفه=ويحرس على لم القلوب ووصاله
اعيش حـرٍ شـهم نفسي شريفه=والآ حياةٍ خـير منـها زواله
مهما حصل لبعض الأمور تحريفه=الكلمـة الشـينه نـدور بـداله
نبي بها ترضى النفوس الاليفه=وترتاح خطّرها وتهدى حواله
وادمح واسامح بألأمور الضعيفه=وامدح بني عـمّي لياجا مجاله
والرجل يدمح عيب جاره وضيفه=وغلـطة بني عمّه عليه احتماله
دام ابن عمـك ماتهـدد بسـيفه=جنب عن العـوجا تولي بفاله
وحـنا لياجانا مـدرب عسيفه=نثقل ونركب ماثقل من جماله
ونستقبله في طيب نفسٍ لطيفه=علّــه يبدّل كلمةٍ امـس قاله
تر ربعنا يـوم الليال المخيفه=سقم الحريب وعز منهو لجاله
حازوا على كل العلوم المنيفه=ستر العذارى ليانتخة في رجاله
وكد قيل( واديار الجماعة مريفة)=ولّـلّـه درّ الـي سـبقنا وقاله
اما أنت لاترمي على النار ليفه=اكبح جموح النفس عما طراله
مـالك ومـاله, الـمزيف وزيـفه=ارفع يمينك عن مصافح شماله
دامك تقول انه مزيف, بكيفه=الريح عمر ماتحرك جباله
ومسيلمة ماضـر وادي حـنيفه=وانت تعرف كل العلوم ومقاله
وياما حصل بعد المغازي نكيفه=ولاكـل نفسٍ لـه تحقـق مناله
وصلاة ربي عد مالشمس شيفه=علـى نبياً كلـمة الحــق قاله