خيل المشاعر ليلها البارحه ليل= شيءٍ مرج منها وشيءٍ قلايع
ميدانها صدرٍ كوته الغرابيل=وفرسانها هم ٍ بدت له طلايع
اول ضحايا خيلها هدة الحيل=وطرف ٍ شقي من لذة النوم جايع
وجسمٍ ذوى ماعاد إبه ذرة الحيل=وعينن مدامعها تفيض الودايع
ودام الرجا بايام عمر ٍ مقابيل=الطيب في راعيه ماهو بضايع
ياللي سبيت القلب من غير تقبيل=قلب ٍ عصى غيرك وجاك انت طايع
انا اشهد انك تستحق المواصيل=يامفخرة جيلك بك الحسن ذايع
لاتستمع فيني كلام العواذيل=لا تحطني مابين شاري وبايع
تراي ماساويت بك باقي الجيل=وعرشك لحاله في علو الرفايع
غلاك فالشريان يجري كما النيل=وهذا يسبب موت كل الربايع
وبنات فكري عن غلا غيركم حيل=لو لاعها من لايع الوجد لايع
مادام لك فالقلب حصن ومداهيل=غيرك يجي عطشان ويروح جايع
عندي على ذلك وثيقه وتدليل=وارضى بحكمك ياحسين الطبايع
الد في غيرك لعانه وتظليل=امشي بمبدأ باب سد الذرايع
اضحك ليا غضتك ببعض المراسيل=يامصدر الهامي بنظم الروايع
يلوم قلبي فيك قلب ٍ كما الفيل=ماذاق من مرّ الفراق الفجايع
ماقالبه وقته على الحط والشيل=مابار حظه في جميع الصنايع
وختامها فنجال بن ٍ مع الهيل=في حاجرٍ ريح النفل فيه فايع