مجني ولاشفت الجناه=تنطح بنادق بالعصاه
اقشر ثلاثه بالحياه=ان كشرت بانيابها
الليل لا نمت مغبون=اعوذ عن بعض الطعون
بالله عما يفعلون=لا داربك دولابها
والحض لانام قهدي=مثل الجمايل بالردي
وش ماتسويه يغدي=تحت القدم يقفابها
حبلن عقدته منّكث=والذيب لو هرول عبث
خلي العلوم اللي تغث=لاتفتحين ابوابها
اللقمه اللي مولمه=توخذ قبل تاصل فمه
كل الليالي مظلمه=ناري كلت شبابها
اركض على صلو الجمر=والمشكله مامن ثمر
ماعاد باقي بالعمر=يسوا على طلابها
من قال ب اني مستريح=الناس ماتبغى الصحيح
وانا عن الفعل القبيح=نفسي عسفت ركابها
لكن عليه بالحرام=اني لا خالفها النظام
وارقى على متن الغمام=عيبن على من هابها
دامي دميّن مادما=لو شرها يلحق سما
بعض الجروح بلادما=يصعب عليك اطبابها
يابنت شوشي والعبي=دامن لحاهم بشنبي
قولي على ذاك الصبي=عيني ترف اهدابها
مابه ربيع بلا شتا=تهدا عواصف وتعتا
الصبر من وين لمتى=مكه علم بشعابها