سهيل نجمه طلع يااللي تحرونه =والقيض باقي ليالي من تواليه
قطانة العد هالايام يخلونه =يوم البداوه حلو ذكره وطاريه
يالله بنوٍ ينوض البرق بمزونه =من مقدم الوسم ينشي من مناشيه
يسوقه اللي ننام وتسهر عيونه =اللي كفل رزقنا والاجل بيديه
سيلٍ حقوقٍ هل النشرة يعدونه =على عموم المناطق بالسعوديه
ياعل ربي يعين البدو من عونه =تزين لأهل الدبش وأهل الغنوميه
عقب العلف والشعير اللي يكبونه =ترعى بأفامه وتشبع في مفاليه
يازين ياقامو المرحال يطرونه =وكلٍ على موتره حمل مقاضيه
رادو ؤشافو مهو قولٍ يقولونه =شمال حد الحيا عرق الخليفيه
والعائدي شغلوه وهز غليونه =أربع وعشرين مهو حجم حصنيه
حرك ورا الذود والخانات مشحونه =مع الوعر والسهل يمشي مماشيه
نهارهم من طلوع الشمس يمشونه =ويمسون على ظهر والصبح طرقيه
يبون قاعٍ هل النوق يتمنونه =فروع الأفيح وفيحان ونواحيه
ربيع والقشع ساق الوسم بغصونه =والطين ماقف وإلغدران ممليه
متساويٍ نبت الأرض وزاهيٍ لونه =الحزم والروض والفيضه وواديه
والفقع في منبت الرقروق يلقونه =حلو الكما والطلاسي والزبيديه
بس أم سالم تجر الصوت بلحونه =تصعد وتنزل تردد كل غنيه