يالله والتسبيـــــح لك والتهـــــــــاليل = ياواحدٍ فـــوق السّمـــــــاوات عـــــالي
يامِهْلِك أهل الفيــــل بطيور أبابيــــل = تجْـعَل مصيـــر الظّـــــــالمين الـزّوالِي
جتني هــواجيسي تقــافى تِقِل سيـــل = تــــزوْد لانسنس هبـــــوب الشّمــــــالِي
تسري بفكري كل ماعسعس الليــــل= واسري مَعَه واطــــاوعَه من هبـــــالي
أمشي واهوجـِـس واستعيد التفاصيل= ولو صِرْت وسط النـــاس كنّي لحـــالي
وبنـــات فكري كِنّها شِـــرّد الخيــــل= ميـــدانها واســع مـــــــداها خيـــــــالي
قِحْص ٍ خزايزهن بديــــع التّمــــاثيل= غـــوالي ٍ ما تـَـقـْــبَل الاّ غـــــــــــوالي
جَنّي يصـــارِعْن الاعنّـــه مشـــاويل = واسْرَجْتهـِــن واخْترت قــافٍ طـــرالي
وين انت رايح يازمـــــان التّهـــاويل= تمــشي على ما تشـــتهي ما تبــــــالي
ما تِلتفِت للي تـــــردّى به الحَيْـــــــل= ولا تنزّل لي تجـــــــاوِب ســـــــؤالي
خَـــذيت طبْع الجيـل يا طابع الجيـــل = تستهتــــــرون بكل طبـــع ٍ مثــــــالي
جيـــــلٍ تمــرَّد راح جيل الرّجــاجيل = واصْـبَحْت تـــايـِه بينهن عــــزّتــالي
شفـْــــت المهــــونه والعنا والبهـاذيل = عقـْـــب المهــــابه قمْت أجامِل عيالي
جيـــل المهـــايَط والغناء والخـلاخيل = مــــوتى النّهــــــار ومتعبين الليـــالي
جيـــل آخِر القصّـــات جيل البنـاطيل = جيـــلٍ يقلـِّـــد لابســــات الشـّيـــــــاليِ
يقــــول واحدهم كسَـــرْت الفنـــاجيل = أنا كِــــــذا، ما للشّكــــــاله ومــــــالي
والبنطلـــون الجنز من غير تفصيــل = إيـــزي، وانا ملـّيــــت لِبسة عقــــالي
ولا عَـلـَـــي من كثرة القال والقيــــل = (طنِّش تعيش) وشلـّـتي راس مــــالي
ماهَم من اللي حصّــل العلم تحصـيل = واستهدَف صروح الشّرَف والمعالي
ولاهَم على درب الــرّجال المشاكيل = اللي ســعوا للطيـــب باوَّل وتـــــالي
ولاحَسّـــــبوا غيب الليال المقــــابيل = جيـــلٍ نشـــأ مستهــــترٍ واتكــــــالي
ولااعمّ كل الجيـــل من شان مااعيل = فيــهم شبـــابٍ قــــــرّبوا للكمــــــالي
لكن من اللي شُـفـْـــت مثـّلْت تمثيــل = لاواهنيّ اللي من الهـــــمّ خـــــــالي
يابـِـنْت ياللي خَطـّــت العين بالميـــل = تكفيـــــن،ووصــــالِك بعيد المنـــالي
تشيّــمي عن مــــودعين التّعــــــاليل = دخـّــان ومعسّـــــل وعودٍ يـــــلالي
وانا عــــزاي إنّي على الدِّين مااميل = واسترجع من المعصيه وانفعــــالي
وعـــــزاي فوحَة ريحة البنّ والهيـل = في مجلس ٍ مابين غــــالي وغـــالي
وعــــزاي لامنّه نقـَـز طـــالع سهيل = وقمنا على (المنشا) نخيـــل الخيـالي
وجَهّـــزْت شنطة عزبتي والمعـاميل = خـــوّة عزيزيـــن الرّفيــــق الرّجالي
عِشْنــــا وشفـْـــنا وابعدتنا المـراحيل = ولا بقي منـّــــي كِثِــــرْ مامضالي