ذيب الكرك جاوب صدى ذيب هدلان =بـعــواه جــاوبلــه ويـقنــب قنيـبه
انـا اشــهد انــه ذيـب مانيب غلطان =ولـه شوفةً سرحان ماهي قريبه
لاشــك ابو سـامر عـزيزً ولــه شـان =بقلــوب ربــــعً مـا ضــرت للمعيـبه
تضمــر لـه الاعجـاب والــود وكـــدان=قــدر ووفــا مـن دون شـكً وريبــه
شــاعر ولـه جولات في كل الاركان =غرب وجنوب وشرق وايمن مغيبه
هـذا الــوكاد ولاش بـالهــرج بهتــان = ولا قلتهــا لـي غــايـةً وارتجيبـــه
يالقـرم فـي قلبـي لواهيـب واحزان=ونيـران قلبـي مـا بغـت تنطفيـبه
اشكـي عليـك الحـال ياطيـر حوران .= وانـت الـذي يسـعى لعلـمً يثيبـه
لـي غايـةً عيٌــا بهـا جــور الازمـــان = عيٌـا يتـلاقى مع شعيبي شعيبـه
مـــابيـننا حـالت اقـاليــم وطــان =ودونــه عصــابات وذبــح ونـهيـبــه
تـصـافـق الاحـرار مــع كــل خـــوان=وكلـن تـزعـم يـابـو سـامر كــتيبه
مـابيـن ديـرة حمص وابــلاد حـوران =حال الخطـر يامسندي والنشيبه
وشلون مادري كيـف ياذرب الايمان =وشلـون تبـرا اجروح قلبً عطيبه
غـروً ولـــه بالقلـب مـوقــع وعنــوان=وغيـره فــلا واللـــه فــاز ابنصـيبه
حبــي لـه اصفى مـن قراحً بعُمان = ينسـاب مـن نبــعً بـراس الجـذيبـه
حـبً علـى وضـح النقـا والوفـا بان = ولا خنـت انـا بنـت الرجـال العريبه
احبـهــا حـبً يـوصــل للاكفــــــان =حبً يابــو سـامر اطعـونه عجيبــه
اشتاق له شوق الصحاري للامزان =والشوق يحـرق وانـت تعلم لهيبه
اسباب بُعـده شيبـن بابـن سوعان = ماغيـر اهوجس والخفـوق يهـذيبه
ومن شافني ينشد عسى ماانت =بي علـةً واحتار فيها طبيبه
وان مــالفـابه حـظ يامسندي زان = لاواللــه الا ايــام عمــري قـريبـه
هذا الذي هيض اهجوسي ابقيفان =وتـرجمت مأساتي ولون الغليبه
اظهرت لك وابديت من ما جرا وكان = مـن واقــعً مـاكـان لـي به رغيبه
من واقعً يفـرض اشـروطه والاثمان=واذعنــت انـالــه طيب ولا غصيبه
ويـامـــا نخيـت فــلان وفـلان وفـلان = واصبحـت انـا مجبر لدفـع الضريبه

حي الكتاب اللي لفت فيه قيفان,= من شاعر" بالحب يشكي نصيبه
من وايـل الكبـرى سلالات عدنان =نسـل البيـوت الـــزاكيـات العريبه
حيــه عـدد مـا رف طيـر"بجنحـان= ومـا ذعـذع الغـربي وجـانا هبيبه
وبعداد ما مدوا على الهجن ركبان=وبعـداد مـا عينـي لنـومه حريبـه
يالوايلـي يـا نسـل ذربيـن الايـمان= نـار الهوى له بلسما" تنطفي به
ان كانهــا ببـلادنـا يابـن سـوعــان= ابشــر بـهــا بالمــال ولا نـهـيبـه
نـاخذ لبــوها روس حظـرا"وبدوان= بـالجـاه واللــي يطلبـه ننتـخيبـه
وان كانهــا بالشــام حـرب"ونيران,= وشبيحـة"مثل الوحوش المنيبه
بيهـا الاسد عنـده وحوش"وثيران=مـاهمهـم شوق الحبيب لحبيبه
على الهـويـه يذبحوا ذبـح خرفـان =حرب"على السنه وما هي غريبه
اصبر لعـل الله يخلخـل لـه اركـان,= ويـزول حــكـم الطـاغـي وتلتقيبه
وما دمت يا راع الوفا فاقد انسان= وطــال الفـراق وطال عنك مغيبه
انا فقدت اللي عضيدي بالاخوان=ولقيـت انـا بالصبـر وصفه عجيبه
من شفتهم لفوه في بيض الاكفان=صــارت حيــاتـي يا محمـد كئيبه
عفت الغرام وحب نعسات الاجفان=شعــل الخدود معطرات الذويبه
واليـوم انـا مـا بين سـجده وقـرآن=وعقــب الجهــاله ربنــا نحتميبه
هذا الذي بالقلب عقب الخفا بان= وخــوافيــا" يالقـرم مــا ينحكـيبه
وصـلاة ربــي عـد هطـال الامزان= وعــد الحيـا ببـلاد خظـرا خصـيبه
علـى رسول"للهـدى كان برهان,=شـفيعنا يـوم المـواقـف صـعيبه