ياللي جفيت الغلا بالماضي انساني=وانسى خفوقن تعلّق في رجى ودّك
ما عاد ينفع تعيد الماضي الفاني=ما دام دربك وطيته في دجى صدّك
اتصد عني تبي لا جيت تلقاني؟=غلطان يا مقفي الخطوات في عدّك
مديت لك ثوب عزّن يرفع الشاني=واخترت ثوبن يناسب قدرك وقدّك
هذا خيارك بغيته في رجى ثاني=يومني ابغي وصالك في رجى لدّك
عنيت نفسك وقلبي فيك عناني=وش عاد تنفع دموعن سيلها خدّك
إمسح دموعك بيدن طعنها جاني=وتشوف قطرات دمي من طعن يدّك
لعبت في صدق حبي لعب ورعاني=وخلطت بالحب مزحك في هوى جدّك
اسأل ليال الحزن والشعر والحاني=وبيبان بيتك قبل ما تعزم بشدّك
سلمت قلبي وفكري لك ووجداني=وجازيت مدّي وبذلي شح في مدّك
وارخصت في سوق حبك كل خلاني=واصبحت في غدر بيعك خصمك وندّك
وحفظت سدّك ولا بيّح به الساني=وبيحت بلسان جهلك سرّك وسدّك
من قبل صدّك بغيتك شوق ولهاني=واليوم ردّي على جيّتْك لي ردّك
لا عاد تطري رجوعك لي وترجاني=خلّك تذوق العنى في يومك وغدّك