سلامن ازكى من العنبر ومسكن وعود=وازكى من الكادي الفواح عطره ثبات
ويــامرحبـــــا عدّ همالـن بغيثه يجـــود=ويا مرحبا ياملكنا ياعظيــم الصفـــات
واعداد ماغـرد القمري وهبّات نــــــود=واعداد سيلن تحدّر مروين للوطــــات
استبشرت فيك الأمه والأمل بـــك يزود=وجيتك سالم علينا من عظيم الهبـــات
والشعـب يرقى بظلك يا ملكـنا سنــــود=وانفوسنا دون نفسك يالملك مرخصات
لك وقفتن بين شعبك والملا لك شهود=والدار تزهى بحكمك ســاهرن ماتبـــات
ارسيت حكم الشريعة بالعدل والعهود=واوصيت بالشعب خيرن موصين للجهات
ومدّيت كف الأبوّه لليتامى وعـــــــود=وحملت هــمّ الأرامل عـون ومطلقــــات
وهدّيت من درب طلاب الوظايف سدود= وبنيت للعـلـم نبراسـن لها جامعــــات
وسعيت جاهد لنهضه مالها من حــــدود=والدار تشهد تقدم في جميع الجهــــات
وللعالم ارسلت للمحتاج عـــونك وفـــود=وارتفعت أيدي فقارى للملك داعيـــات
وللعاني ارسلت جيشك ما بديت بصـدود=حتى تعيش الشقايـق بالأمن هانيــــات
ودايــم تبــادر وتسعى باذلن للجهــــود=في حل أكبر قضايــا بالدول معضلات
في كف طيبه ورحمه وارثه من جدود=وفي كف سيفن تواقد في نحور الطغات
وسلطان ياقف عضيدك معجزن للحقود=ولامد كف السخى والجود منه عظات
والنايـــف اللي محقق للأمن والركــــود=مِحْزَمْك لا ثارت الظلال جهل وفئات
لجلك نسوق المطايا للوغى والحشـود=ونفتك براس المعادي ضرب بالمرهفات
ولجلك تهون المنايــا والولد لك نقـــود=تفـــداك أرواح شعبـك للوفــا هيّنــــــات
ولجلك نفـك العقايــد جلّهــا والقيـــــود=في درب سيــر المسيـره للعلا راقيـــات
ولجلك تهون الصعايب حملها مايكــود=ما دام مثلك شتـلها بالمنــاكب وجـــــات
هذي خطوطن رسمها للوطن بالبنـــود=صقـرن تعلى بفعلــه ماكـــره نايفـــــات
وحّد شتــات الجزيره قايــدن مايحــود=عبدالعزيز الله اكبــر جامعــن للسمـــات
شهم وكريمن وفارس سمعته للخــلود=وسطر لنــا في ثباتـه مجــد والمعجـزات
هذا وطنـــا عزيزن هامتــه ماتنــــود= ما دام مثلي ومثلك عن حــدوده حمــات
يادرّتن صانش الرحمن عين الحسود=والطــامــع الله يـــورّد حالتــه للشتــــات
يا لله يا مرسلن رسلك علينـا شهـــود=و يا عالمن مــا نكنّه بالصــدر خافيــــات
تحفظ ملكنا وتحفظ دارنا والحـــــدود=ويـبـقى ملكنــا معــافى ذخــر للمقبــلات
ويطول عمره ويبقى دايمن بالوجــود=و يـارب نطلبك عفــوك والثبـات الثبـات