لبيه يللي تسرق الطرف لبيه=صحيح سارق بس منت بحرامي
تماد في سرقتْك ما قلت لك ليه=ما دام عقلي في محبتْك هامي
سرقت قلبي والعساكر تباريه=ياقوّ قلبك مطلقن للخطامي
رميت سهم الحب للقلب ناويه=حتى فرق لضلاع للقلب دامي
سهمك خطيرن واذبحتني مراميه=ما دام قوسك طرف والزين رامي
وردتني بير العنى والشقى فيه=وبير المحبه دربها دوم ضامي
اعلنت حبك محتمل للمشاريه=واعلنت انّك في حياتي غرامي
واعلنت انّك مالك العقل غازيه=وحقّق هجومك فيه حكمن نظامي
ومكّنت حكمك فيه والحصن بانيه=واصبحت اسيرك دون قيد وزمامي
وتدري متى يهنا لي الغزو والتيه=لا صار منْك الجيش والقصد سامي
ياهيه انا رجلن بعيده هقاويه=حرن مطاليعه تعدى الغمامي
ومن قوم عزن واللقى ما تحاتيه=قومن لمن ثارت كما السيل طامي
فلا تضْرم النيران والحال تشقيه=وتنْعم على الراحه بريش النعامي
ابيك توفي والجفا ما تطرِّيه=وتسهر تخاطر روح حتى المنامي
واكون فارس حلمك اللي تعنِّيه=هقوات بـِعْد الخلِّ وسْط الجهامي
والميسم اللي طارق الجوف كاويه=ومصْلي على جمر الوله والحطامي
لا صرت اتبع طرف والشوق ماليه=بسّ الظروف المانعه ما تسامي
منّه تعلمت الأسى كيف تخفيه=ومنّه تعلمت الصبر والصيامي
وما كل ما يبغي الفتى دوم ياتيه=وما كل توأم بالمحبه سيامي
يالله يللي من ترَجّاك تعطيه=ويامسير الأكوان حسب النظامي
تِذْهب كسوف الشمس والليل تجليه=ويبقى شعاع الشوق بَعْد الظلامي