واقف على قبرك ونفسي الومها=والصدر ضاق وروحت بي همومها
نعم خذلناك وخذلنا رسالتك=ماتنصرك امه تشخر بنومها
سلام يا اطهر بشر يارسولنا=صنت الامانه ماتوانت عزومها
صلى الله وبارك عليك وملايكته=صلاه ازكى من هبايب نسومها
دعيت سر وجهر تصدع بدعوتك=لين انبسط دينك لفارس ورومها
والذي نفسي بيده مانجملك=لانا فقدنا دينها مع سلومها
بكرى اذا بالعرض جينا نقابلك=وش عذرنا عند السؤال ولزومها
امتك ضاعت ياحبيبي وسيدي=والجسد الواحد مسوس بجرثومها
ناس تعشى خبز يابس وحمّدت=وناس تزبّر بالصياني لحومها
وناس تصلي والفكر فيه وشوشه=تطعن باعراض الحراير بصومها
وناس تهلهل ع الشهيد وجنازته=وناس تسمّع للطرب كل يومها
حتى الزكاه اللي علينا فرضتها=ما أديت ولا توزّع قسومها
وكتاب ربي مالقى من تدبّره=الا القليل للي طلب من علومها
لآحنا رجال السلم ونعمّر البلد=ولا احنا رجال الحرب ونرد قومها
نفرح بزلات الخوي نفتخر بها=قلوب سماد وتلبس ابيض هدومها
ياسيدي امتك مستضعفينها=مستعبده وهاينتها خصومها
لانه نحت عن سنتك مع نصايحك=تركض ورى الدنيا وترفع خشومها
اجيالنا تركض ورى غاده وسمر=بالمعصيه تفخر وكله قرومها
تاهت خطاوينا وضاعت دروبنا=نطرد سراب ولافحتنا سمومها
ياسيدي غصّه بحلقي وقلتها=وأخبي العبره بطارف كمومها
واقف على قبرك وغصّت مدامعي=والصدر ضاق وروحت بي همومها