سرى بي هواي لدارحاتم وحان السّيـر=على ال(أيرباص)اللي بدت تطوي الكـوره
سرى بي وسرّاني لـحايل بلا تأخيـر=لدارٍ على ســاسٍ من المجد معمــوره
حـايل مقر الجـود لاقلّ جود الغيـر=قصِّة فرس حاتم بالاذهــان محفــوره
وصلْـتَه بليل، وكان ساعدني التّصوير= كأنّه بحضن جبـالها السّــود بلـّـوره
عـروس الشمال وحبّها عند أهلْها غير=ولها في خيال أهل الأدب والشّعر صوره
عروس الشمال اللي تغنّى بهواها الطير=يجيبه لها صوت الشخاليل وحيوره
لبْسَتْ أجا جلباب، والتاج شمس عصير=عذوق النـّخَل عَـقده والاشجار تنـّـوره
وكأنّ الجبال اللي توسّـد نفـود الخيـر=تفــرّج على طلـّة محيّـاه مبهـوره
توسّـط جبال العِـزّ من قبل عهد الزير=وبقيَت على البـاغي عصيّه ومستـوره
وفي عهدنا الحاضر ومع رغبة التغييـر=صـدّت عن العالم وشامت لاخو نـوره
وفي ظِلّ(عبدالله) بدَت رحلة التطويــر=يقـودَه(سعود) اللي بدا واضـح ٍ دوره
تأخـّرْت ياحايل وعذراً على التقصيـر=تجيـك البيوت الغرّ وتعـود معـذوره
ومعـذور من قبلي ولو خـانه التعبيـر=يتيه الشـِّعِر لاصار في وصف مشهوره