ما نزل دمع يشفع لي بوقت المصاب=با العزا ما به احدن قال عني حزين
مبتسم تقل ما با القلب طعنة حراب=راودن شك بان الحزن دمعات عين
قمت اهوجس وادير الفكر وشلون غاب=عن عيوني هذاك القبر واللي دفين
قبل (برزان) في (صديان ) حفر التراب=عقب (برزان) في (صديان ) لبنه وطين
مدري شلون جيت ومدري من اي باب=مدري شلون رحت ومدري عن اي شين
المصاب الجلل ينسيك ما با الكتاب=ربي اغفر وسامح غفلة الغافلين
زل وقت المواسى حل وقت العذاب=عقب ما الناس تقفي كل مابي يبين
ادري اني بعاني لوعة الاغتراب=كيف وانتي غلاي ومهجتي والظنين
يام عبدالسلام القلب بقفاك شاب=في غيابك يشيب الطفل في ساعتين
عشت معك الطفوله والجهل والشباب=عشت معك الرجوله والولع والحنين
قاصرين و يتامى زادنا الاحتساب=كسرة الخبز نقسمها الي وجبتين
يمضي العيد ما نلبس جديد الثياب=ما طلبنا سوى المعبود ربي يعين
ربنا قال من يصبر بامره يثاب=يا الهي رجيتك ثبٍت الصابرين
ماحدن وجه لوجهك سواله وخاب=طالبك تجمعن به يرحم الراحمين
انت رب البريه رب يوم الحساب=اسكن اختي جنانك يا القوي المتين