مـن اللـي يعـزّى فيـك ياسيّـد الشعـار=هلك او هلـي او كـل مـن قـال ياطيّـب
أعزي مزون الغيـث والا قريـب او جـار=( شبية المطر )، يبكيك ( أجا ) دمعه يشيّـب
ولو شفت ( سلمى ) دمعها جـارين مـدرار=تشوف الدبـش بتلاعهـا صـار متسيّـب
وحزنت لك ( السمراء ) مع ان الجبال احجار=تعرف ان من تحت الثـرى شهـم وقريّـب
تأثر جبـل شمّـر لفقـدك وصـاح وثـآر=بـدى حايـرن مذهـول وجـلٍ ومتهـيّـب
شكـى غيبتـك حاتـم فقـد شبتـك للنـار=وحتـى ( قليـب الشيـخ ) بغيابـك قليّـب
تعال أمش ( لتوارن ) مع ان الجبـال كثـار=تشوف ان واديهـا غـدى عقبـك شعيّـب
بكـوك اليتامـى والمساكيـن والخـطّـار=بكاك الكرم والطيب (وركان ) (وشطيّـب)
بكـوك الفقـارى وهملـت دمعـة التجـار=لانـك لكـل النـاس متواضـع حبـيّـب
ولانـك سليـل المجـد والمرجلـة والكـار=سليـل (الطنايـا )حافـظ السّلـم ومغـيّـب
دلالـك تبهّـر هيـل مابهـرت مسـمـار=ورآسـك رفيـع ولابتـك علمهـم طيّـب
وبالليلـة الظلمـا تـرى تفقـد الاقـمـار=طلال انت حاضـر لـو يقولـون متغيّـب
لك الطلـة اللـي تسعـد القلـب والاعمـار=ولك ريحة العنبر ولـو مـا أنـت متطيّـب
علومك وذكـرك يالبناخـي علـوم اكبـار=ولا احدن وجد بـك خصلـتن يمكـن تعيّـب
عسى الله خـلاق البشـر كاتـب الاعمـار=ينجيـك والله لادعــي مـاهـو يخـيّـب