أظلم الكون واهتزًت رواس الجبال=شققت جيبها (سلمى) و(أجأ) له عويل
علم يوم الاحد ماهو للاجواد فال=ساعة الصبح (سبع) وكنها (سبع) ليل
الحدث با الجنوب وشاب راس الشمال=(الجدي) قبل كل الناس عزا (سهيل)
غادرن حضن حايل وافيات الخصال=حسبنا الله رب الكون نعم الوكيل
فيهن الحامل اللي تنتظر له عيال=زوجها وافي الاشبار نعم الحليل
وفيهن اللي تمنوها خيار الرجال=وفيهن اللي خطيبه شخص ماله مثيل
وفيهن اللي مدللها ابوها دلال=كل ما ودًعه لازم دموعه تسيل
يوم قالوا توفت صاب عقله هبال=طار من مجلسه مذهول مثل الخبيل
من يلومه وحايل حالها غير حال=وحمل سكانها با الفقد حملن ثقيل
يا الله اني طلبتك يا عظيم الجلال=يا الكريم الرحيم المستعان الجليل
ترحم اللي لفنًك من بنات الحلال=رحمتك يا ولي العرش ماله بديل
ما لجينا لغيرك با الرجا والسؤال=صبٍر قلوبنا يارب صبرًا جميل