قال الذي يسكت ويخفي ظروفه=مبطي يابو ثامر غثا الوقت ناشه
قلبي معزب والطواري ضيوفه=مُتعب ومن جور الدهر به لياشه
حوادث الدنيا عظه لفيلسوفه=على بساط البحث يِتعب نقاشه
مهما تزخرف ما عليها حسوفه=والله ما تسوى جناح الفراشه
ما فيه حي ٍسالمٍ من صدوفه=صعلوك ولا من هل الجاه باشه
ترميه في قبرٍ توحّش كهوفه=لو كان بالدنيا حريرٍ فراشه
بصدور خلق الله مضارب سيوفه=محد ٍ يقاوم سطوته يا ستهاشه
هذا ونفسي يا مفضي عيوفه=تشوم عن عظمٍ قليلٍ عراشه
قلبي يحب البرّ لو به كلوفه=شمت هواء الغربي تزيد انتعاشه
من فوق جيبٍ صافياتٍ بلوفه=قشيط هملولٍ لصوته حشاشه
يا صرت خامس لاربعه ومحفوفه=والكل منهم هبت الريح حاشه
بالمزح نجحف والرجال معروفه=ما يزعل الا واحدٍ به دحاشه
في خايعٍ ما ناش عشبه حفوفه=متلاحمٍ نبت الوعر مع دشاشه
قفرٍ جنابه يطرب القلب شوفه=لا يا بعد شوفة مسلسل قماشه
بس الحباري فيه برقٍ دفوفه=تطير شوف العين ما هي بشاشه
ومعنا ربيبٍ عايزاتٍ وصوفه=عدل المناكب منطحه به رباشه
بالوصف وان قفا تعارض كتوفه=بيضٍ سراويله بكفه حراشه
يا شالوا البرقع وحقق بشوفه=وتل السبوق وضم غيظه بجاشه
شافه تجضع خارمه ومخطوفه=بين الرجاء والياس زاد اندهاشه
وتكبّرت من زود رعبه وخوفه=وحول عليها مثل لمحة فلاشه
وجيناه يمزر من معاليق جوفه=دمّه على صدر النداوي طشاشه
يبادل على منتق نحرها كفوفه=متخالطٍ فيه الزعل والبشاشه
هذا هوى قلبٍ همومه تلوفه=وعلى الولي رزق النفوس ومعاشه

للشاعر : مشفي حمود الجرواني