‏سلام يا ضيوف الحفل والجماهير= اول مايُبدا فيه توريد السلام
وبعد السلام ياهل الوجيه المسافير=بالله لحظه شوي قبل ابدا الكلام
‏صلوا على اللي سيرته كلها خير=نبينا اللي اعز الله بالاسلام
‏والحمد لله خير وامن تياسير=في ظل منهم للحرمين خدام
‏العهد زاهر عهد رؤية وتطوير=وخيرٍ ويتابع خير من عهد الإمام
والشعر حل ووردنّ البواكير=وأنا ليا منه حل لي دور واسهام
‏وأبدابذكر الله وحمدا وتكبير =واقول قولٍ واضحٍ به ادغام
‏يالله جملني بزين التعابير=عن كلمة يفرح بها كل لوّام
‏اما يدربيها على فوهة البير=ولا يحولها على حقول الألغام
‏وأعود للموضوع من غير تأخير=‏وأحط بالموضوع لي بصمة ابهام
‏حنا نتشرف يا دعونا المناعير=وناتى لو ان الدرب سيراً بالاقدام
‏وأن لبّي دعوة معزة وتقدير =لا و الله لا شيء مفروض و الزام
‏لبيك يا دعوة رجالٍ مشاهير =لبيك يالداعي لك إجلال وإكرام
‏دعوة صقور من خيار المواكير=‏ نوادرٍ ما بين غالب وغشام
‏ اللابة اللي ينطحون الطوابير=يومنّها في علط الارماح واحسام
‏عز الرفيق ويحتمون المظاهير=بني حويفظ للعدو عوق وكام
‏ ربعٍ لنا من دور عرار وأعمير=ما عرفها من اليوم والا من العام
‏ولو عنهم اب اعطي مسيرة وتقرير =تعييني الأوراق وتجف الأقلام
‏لكن رؤوس أقلام ونواصل السير =مع الضيوف اللي عزيزين وحشام
يامرحبا ياضيوفنا ويامسالخير=ياشراف مكة ياعريبين الاقوام
اسمٍ سطع من حد صنعا الى الدير=ومن الخليج لبحر جدة الى الشام
متميزينن يالهواشم عن الغير=في عصرنا الحاضر ومن قبل الاسلام
اسمٍ كبيرٍ مايبي زود تكبير=مثل (علم سلمان ) من بين الاعلام
ويامرحبا قدر. ومعزّه وتوقير=في حفلةٍ تجمع بني عم وارحام
الله يحييكم ولكم كل تقدير=تحيةٍ بعداد من لبس الاحرام
هلا على الهيل الخضر بالمباهير=والعود الازرق بالمباخير قدام
وحياكم الله ومرحبا يالمسافير=على صحونن حملوها بالانعام
في حفلة اللي يكرمون الخطاطير=ولهم بميدان الكرم تاج ووسام
وقبل الختام اقول قدم الجماهير=ياطيور شلوى ياعزيزين ياكرام
العذر منكم كان بالقول تقصير=بذلت جهد وباذل الجهد مايلام
هذا وصلى الله على قايد الخير=بعداد من صلى ولبى ومن صام