همي اللي كل ماولى يجي = ياهمز قامت ضلوعي تزهمه
مايباعد خابرن له منهجي = بين قلبي والضلوع المبهمه
عاملن له بالضماير مدرجي = كل ماأرتاحة يمر ويلطمه
يانديمي هات حبر ن يمزجي = بالورق حاول تخط وترسمه
كالوشم من فوق خد العسوجي = زيّنَه ربه وزين مبسمه
فكري اللي شدخيله وأسرجي=من معاني ماتبي له ترجمه
حافظه عن كل شئ يسمجي=خلصه من كل زيف ونظمه
وآضحه مثل النهار الأبلجي = وخافِيَّه ماكل رجل(ن) يفهمه
وآرثه من راس عود ٍينتجي = مايجيب إلا بيوت (ن) محكمه
ياإلهي وأنت غوث المرتجي = يوم أخذته راجي إنك ترحمه
بعد ذلك هات عون المحوجي = من وكيله صانعه مارهمه
جاء من اليابان حي المنتجي = وقفه في جمركه ماسلمه
منوة اللي باغٍيَّن له مخرجي = من ورى الحدين زيته كيمّه
ياضرب خطو الطريق الأعوجي= ضو شعالٍ بليله مضلمه
يشبه لشيهان بحرن أهوجي = قرنسه ربه وفعله علمه
ياتقفى صيدته ماتنهجي = كل ماحاشت كفوفه حطمه
أوكماالحرالجليل الأفحجي = ملك شيخ ٍمايحسب درهمه
ذاخره يالاح برقه وألعجي = برق وسم(ن) في ثنايا المرزمه
باغيَّه يازان نبت العرفجي = في دعوث (ن) بالروايح طمطمه
في إنقرها للحبارى مدرجي = ماسرح به راعيَّن هو وغنمه
إرتفع عنها وصك وعرجي = إختلط ريش الحبارى ولحمه
ذي وصوف الجيب كله تبهجي = لونه أوضح والجنوب موسمه
كاملن ماهو زمالة عربجي = التوانك والسبير مدعمه
من تملك طارته ماحرجي = ياصل الحروه بوقت الملزمه
وإن مسك له خط سهلن لجلجي = راعيه ياقل عزمه يجحمه
فوقه غلام(ن) عزيز المنسجي = مايخاوي كل عفن وشرذمه
خذ مني مرسول عجل وإنهجي = لبو عبدالله وحالاً علمه
يامبارك وأنت عون المحوجي = ويش رآيك بالهنوف المكرمه
له عيون (ن) واسعات ودعجي = والبلى كل البلى ياسلهمه
إن هرج كله دلع وتغنجي = وإن ضحك طب الجروح وبلسمه
يامشا تقول ثوبه فججي = ردفها يبي يفارق محزمه
وسطها شبرن يجي أو مايجي = والنهد قض الملابس وأعدمه
مشكلتها يالسنافي تسهجي = ماتكلم واحد(ن) لو كلمه
هقوتك هذا غرور مرججي = أو ثقه بالنفس ياالله سلمه
ماربا بين تربه وأعيوجي = ولا نقل حبل الحطب في معصمه
ولا عرف خب الرضم والأصلجي = ولا بناء بيت الشعر بأم رضمه
ولو يشوفه بصري(ن) مايرتجي = طرد زينات الملاثم حرمه
ندري إنك بالمثل ماتفلجي = شاعر(ن) ماشال بوكه وقلمه
يامبارك سالفتها تحرجي = مشكله ياخوك ماهي مسلمه