الصراحة ياحبيب القلب راحة=مار انا محروم حتى من االوضوح=
كان ترضى بالقليل من الصراحة=لا تذمر واترك الهاجس يبوح
كل منا له حدود وله مساحة=والمشاكل مثل ماتاتي تروح
خذ مع الشاعر عن الهم استراحة=تمطر اشعاري وبراقك يلوح
همنا واحد وخلوتنا مباحة=ائتلاف ساق روح وجاب روح
ان تصافينا يصير الكون واحة=وان تخالفنا تبادلنا الجروح

دام قلب الضيغمي تم اجتياحه=في هوايل معركة فتح الفتوح
كنت اظنه بالهوى يضمن نجاحه=دام قلبه يشتعل حب وطموح
وكان روحه في هوى غاليه ناحه=دون ذنب ولا فصول ولا شروح
فرصتي بالعمر مازالت متاحه=وماتزال بروق فرحتنا تلوح
لاجل ناخذ بالهوى رحلة سياحه=للغزال الشارد الصعب الذبوح
وكان عواد العلي ساق اقتراحه= نستمع للصاحب الشهم النصوح

ليه ياعواد شديت الركايب=صوب ريم دارها ماهي قريبه
طايرن تنقل معك عدة حقايب=وناقتك وسط العرب كلن دري به
تنتظر شوف الغلا زين الذوايب=ناوي وسط الخلا ترعى شعيبه
ياعساها خير ياريف القرايب=كان ماطاحت عظامك في قليبه
خذ ثمان نقاط ياعطر الحبايب =قالها اللي شارب قبلك حليبه
اولا: دور الهوى ماهي غصايب=وكل قلب بالهوى يلقى نصيبه
وثانيا: طرد الهوى ساس المصايب=ومن دخل قدامكم ذاق الغليبه
وثالثا: عندك عيال ولك نسايب=وراحم جمهاة راسك من عسيبه
ورابعا: لا تشلعك صفر الهبايب =ثم ترجع لي مثل خشة زبيبه
وخامسا: تدفع فواتير وضرايب=والفلوس اليوم ماكلن يجيبه
وسادسا: زولك مع الخفرات شايب=وعمر ثوبك ماظهر عطره وطيبه
وسابعا: قلبك ضعيف بالنوايب=يرتفع ضغطك ولا تلقى طبيبه
وثامنا: لو تشتكي نار اللهايب=جبت لك كل العساكر مع نقيبه
وراح اقول انه مع الافغان غايب=يدعم ارهاب البشر ربي حسيبه
صار في فكره تعاقيد وشوايب=وهو عقيد القاعده ولا خطيبه
ويوم سبتمبر تره كان السبايب=وناوي يضبط لواشنطن مصيبه
لاجل تصبح وسط واشنطن نهايب=وتسجنك رايس وباول في زريبه
دون شيخ ولا بنود ولا طلايب=لين يطلع في شطوب الورك شيبه

جيت مثل متيح شراي الطلايب=ماخسرت ولافقدت الا حبيبه
ضقت من جهل الحكيم من القرايب=والمنايا خبط عشوا من تصيبه
رحت مدري جيت ونياقي ذهايب=وارتميت بحضن هالتنا الاديبه
والثمان بمثلهن وابليس غايب=من ظهر ياخذ من الزاهق ضريبه
اولآ علم الهوى عند الهبايب=من يقول الطيب تكراره يعيبه
ثانيآ عادات ميال العصايب=من ظهر ذيب الظلام ورحم ذيبه
ثالثآ عن ثانيآ ماهو بنايب=مثل تظمين المجلد بالحقيبه
رابعآ رقم جعل شقر الذوايب=يقبلن سد الشواغر بالكتيبه
خامسآ لاقيل ملعون الصلايب =جده الخامس تراها تنتهيبه
سادسآ عشيتني خبزه ورايب=واصطبحت اليوم بوجيهآ كئيبه
سابعآ سبع وسبع بلا نصايب=من عوالم خالق الخلق ورقيبه
ثامنآ ياثامن السبع العجايب=بلغ المستعربه قبل العريبه
عن كنوز الجوف عطبين الضرايب=يسأل التاريخ والراوي يجيبه