يامشعل العسام مسيك بالخير=والا صباح الخير وقت ضحويه
سلام صافي من حليب المغاتير=اللي رعت عشب الفيافي زميه
سلام يشدا في ثعول الشخاتير=ابيض يسابق مزنةٍ مرزميه
عليك يا نسل الرجال المناعير=اللي على علم المراجل عفيه
من عقبها باشكي لك الحال ياطير=حرٍ تعلى بالطويله مجيه
وابنشدك ثنتين والثالثه خير=وكلن على ماقيل ينشد خويه
الاوله مثل الدلال المباهير=عليه من عطف الولي مرحميه
اقفت وانا قلبي تشكه مسامير=والموت حق وكل حق ووفيه
والثانية حسمى ربيعه نواوير=ترعى بها قوس الظلوع الشقيه
لكن زمانك لا وقف بالنواطير=يحرم عليك مشاهدك للهويه
عُرف العرب والحجر مايجلب الخير=يعزل قلوبٍ في بعضها رضيه
والثالثه فرقا السنين المعاسير=ابيض ربى بالراس لا واخطيه
عذبت انا قلبي وقلبي كما الطير=يكفخ عقب ماصاد صار الضحيه