ياالله بوقفه طيبه مع هل الطيب=وعلماً ينومسني إلى جيت اعده
دعوني أمثل رجال المواهيب=ندابة الحيزاء قروم الاشده
عند الرموث مكملين المواجيب=لطامة العايل رجال المسده
زباين الجزلات ستر الرعابيب=نطاحة الهده إلى قيل هده
يوم النخاوي دون حرش العراقيب=ادعو طماميع اللقايح مصده
هدو بملح الجبخان اللواهيب=والسيف روي القاع من ضرب حده
كسابة الطولات نعم المعازيب=مكارماً فيها الحكا مستجده
واليوم في تكريم راع المواجيب=علماً لآ ابن ساعد وكلاً يعده
محازم الصملات مايلحقه ريب=ورثه باابوه ومن خواله وجده
يوم احتزم للمرجله واسرب الذيب=حط الفشق بحزام جاشه وشده
كنه يقول وعالم السر والغيب=إنا عطينا شي نقدر نرده
الموت بحزامي وبحزامي الطيب=حنا عرب للصايره مستعده
ومن مركز الحكمه حصان الاطاليب=انقذ ولد جاره بعفوه ومده
لها بعين الله موازين ومجيب=كفكف دموع محاربات المخده
مواقفاً ماهي صحون وتراحيب=موقف ولا كل الرجاجيل قده
عفو الرقاب تهومها القوم وتهيب=تنشب بحنجور الضعيف وتسده
مرقابها مايشتبه بالمراقيب=مير الكذيبه جاه واشرف بسده
مطامعه ماهي بنوك وملي جيب=اجر وكرامة جار نازل بحده
وكسب لنا الويلان شباً وشييب=وادعى مغاليل الضغاين موده
ايوالله الويلان عكف الاشانيب=ريف الضعيف ان قيل ياالربع رده
ركابة الصفراء جموعاً جناديب=على العداء حدايةً مستبده
صوارماً ترمي العشا بالمخاليب=والجار ماباحو كنينه وسده
لاشك هذي قدرةً من مكاتيب=ولله في مايكتبه شي يوده
تمت وعزوة محزمي بالمواهيب=يجسر بنا قلب الجفول ابمهده
شرايد عدانا تروّح مصاويب=وكرامة لححانا النشامى تعده