هب الشمال وجابلي ريح الاطلال=وذكرني الاطلال معنى البطوله
اشعل فتيل السالفه بين الابطال=مجدن بقاء من آخر كنوز دوله
ياحيف ياوقت المكارم والافعال=ماكن شيٍ صار وأندار حوله
شانت نوايا الذيب ياطيب الفال=من عقب ماهو مرتكي للرجوله
الوقت غير سيرته مثل الاطفال=ينسى ولا يفهم معاني ميوله
اهتز عرش الطيب ياراع الامثال=ضاعت مساعي رحلته من فضوله
هذا جنون الوقت ياكثر الاهوال=في هالزمن كل المبادي عجوله
نرسم ونبني كلها آمال بآمال=نضرب ونطرح بس مامن عموله
ياكثر لجتنا على صدق الاقوال=بس الصحيح إنسير عكس المقوله
ضاعت مبادينا على كل الاحوال=وحنا ندوس الارض عرضه وطوله
ندري وندرك والخطا شر مازال=فينا مقام رجال وفينا طفوله
وصاح الشمال وجابلي كل الاطلال=احرق فتيل السالفه والبطوله

ياصاحب المبدا ترا الحلم رجال=اذا ذبحت الحلـم راحـت رجولـة
راح الزمن في ما مضى به من افعـال=وكلـن علـى ماقيـل نـوخ ذلولـه
هذا زمن (من لـه حيلـه فيحتـال)=عادي ترى والنفس ماهـي خجولـة
ياما عليها الارض من زود الاحمال=ياهي تحمل شي ماحـدٍ يطولـه
بعض البشر يحتاج له ضربة اعقـال=نقصٍ على الدنيا بعرضه وطوله
وبعض البشر متكبرٍ كنه جبـال=ودك تصطـر خشتـه فـي نعــولـه
وبعض الرجال من النعومة بيختـال=ودك يلبس طرحةٍ مثل خولـه*
وبعض البشر بالبخل يضرب بالامثال=اذا طلبتـه شـي قـفـى بـزولـه
وبعض البشر لاضقت وقف ولك قال=ضيقتك هـذي هينـاتٍ حلولـه
تبي وجاهـة فيـه والا تبـي مـال=بس لاتضيق بشـي يابـن الحمولـه
هـذا هـو اللـي لاتمنيـت رجـال=يسـد بالدنيـا بعرضـه وطـولـه