يابو زايد اسمع كلامي واناخوك=الجيب خله جاهزٍ ياعضيدي
ولامن جهزته قم وقرب لي البوك=أبكتب اللي زارني من جديدي
قافٍ جديدٍ من صدى الفكر محبوك=صغته وعسفته على مانريدي
أقطف جزيل القاف والهزل متروك=ومعناي اقوى من صخرها والحديدي
هز الخفوق ودك بالقلب داكوك=لاقلت انا له كف جاب المزيدي
واللي طرى للقلب مافيه مشكوك=رجلٍ على الطولات فعله مجيدي
أبو فارس لامن الأنذال حدوك=لاجيت عنده شفت حالك سعيدي
إبراهيم بن عزيز من الناس مبروك=عريب ساسٍ والسجايا حميدي
له ماقفٍ لاجاه من يشكي ضنوك=يشكي ضروفه والزمان العنيدي
قام وتنهض واصدر العلم بصكوك=وتبدلت بالخير وعيشٍ رغيدي
يابو فارس هذا انت والخير لأبوك=هو الذي رباك وعلمه مفيدي
والطيب ماهو صفقةٍ داخل بنوك=الطيب ساسٍ والمراجل رصيدي
يامدله الضيفان لامنهم جوك=لاجوك من قريبٍ والا بعيدي
لك مجلسٍ ماهو عن الضيف مصكوك=فيك الكرم والجود والله شهيدي
يفداك يارع الوفاء كل صعلوك=اللي كما ضبٍ يروم الرديدي
والحر مايوقع على كومة شبوك=له ماكرٍ من فوق راس الجليدي
والذيب يسري لو على دربه الشوك=لاحدد الغارات ماهو يحيدي
وهذي علومي والمدح فيك مشروك=هذا ابو زايد بالمدايح سنيدي
يومه عزمني يمكم قلت له دوك=دوك المفتاح وشغل الجيب سيدي
وتم اللي الكلام اللي به القاف مسبوك=من خاطرٍ ماقال غير الأكيدي