يعيبني والمشكله كله عيوب=ليته على شانه يريَّح ضميره
ويرتاح مايجني على نفسه ذنوب=يغنيه عيبه عن معاييب غيره
ليت الردي لو مرةٍ يقدر يتوب=وعن الرداء والشين يعدِّل مسيره
يعيبني والعيب شربه من الكوب=وتشبِّعه كنه اسلاك الظفيره
ياهيه انا كلي على النخوه دروب=بنيت ساس المجد في كل ديره
أحفظ سلومي واحتمي كل ماجوب=تلقى مكاني بين شيوخ العشيره
والشعر يعرفني وانا صغته اسلوب=كل المعاني من قصيدي غزيره
يجيب لي شعر الغزل كل محبوب=أسرح وروِّح والسوالف كثيره
والمدح مالي عنه بالشعر مجنوب=أغوص بحر المدح واترك غديره
ويعيبني لأنه من الغيض مكروب=ومن فوق عدِّي جت حباله قصيره