ضاع معيار الندى بين القبايل=واستوى راس الخلايق مع متونه
والكديش اليوم من ضمن الاصايل=وراعي المعروف يجزى بالمهونه
ومن يريد المجد جانا الظهر صايل=في تواريخ غدت تسجع لحونه
في غواني هيه ياخضر الفنايل=ظنوا التاريخ لوح يصبغونه
وحضرة الدكتور لو ممشاه مايل=راح يطبع والعرب مايمنعونه
وحالف باللي رفع مقدار حايل=وحط نسل الهون بالمقدار دونه
وزادها بين العرب مجد وفضايل=لين نالت رتبة ما ياصلونه
ما ينوش امجادنا راع الغوايل=في هجين الكتب واللي ينشرونه
قبلهم قوم وحواسيد وهبايل=وعالم مال الخلايق في بطونه
وحاربوا سيرة كريمين الشمايل=ورغم حرص القوم عجزوا يطمسونه
وجربوا بدروبهم كل الوسايل=وغادرت تحت الظمى تقرع شنونه
ماخبرت اللي طمس شمس القوايل=او مفاخر لابة مايلحقونه
ماكسبنا الطيب صوغات ونحايل=من شريف بالعرب يسحب ردونه
او دعايات على شاشة موبايل=لاجل شيخ بالهدايا يرتجونه
نالها اللي له عزوم وله نفايل=تنتهض من دون دعم ولا معونه
وشيمة شالت عواجيز وعوايل=وتطلق اللي بالقسى طالت سجونه
رغم كون احوالنا مامن صمايل=ولا ملكنا بالعرب نقوة خزونه
وصار من يسكن على جال الثمايل=والموارد بالظمى مايقربونه
وان نزل ماله مع العالم نزايل=وان رحل كل العرب مايفقدونه
صار له في نجد صولات وعمايل=والعرب من خوفهم تسهر عيونه
ياسلام الله عدد وبل المخايل=وما تلالا بالدجى بارق مزونه
للديار اللي لها قول وفعايل=وتكرم اقدار الرجاجيل وتصونه
في وقوت الحرب وعكوب الفتايل=جمرة حروب العدى مايكرهونه
من يحاول حربها كز الشلايل=وكل فرسان الجزيره يجمعونه
والقبيله مالها ربح ونوايل=ضد قوم خصمهم مايرحمونه
ورغم هذا حربنا كانت دوايل=ياربحنا الكون والا يربحونه
الصريف جموعها ماهي قلايل=وانهزم شيخ العرب يشكي طعونه
وسمنها بالكود والشدات سايل=لو يغيب الغيث ماغابت صحونه
جارهم بجوارهم يلقى الجمايل=وان وقع في زلته مايفضحونه
بالعرب مايرتجي عنهم بدايل=خايف جيرة هتول يشتكونه
ومن ينادي وين وافين الخصايل=في جبال الطيب ماخابت ظنونه
قبل حاتم طي وعصور الاوايل=وقبل تطلع في جبل سلمى سنونه
وانشد الوافين في كل القبايل=والخيار من العرب مايجحدونه
وعندك العتبان والا نسل وايل=وراضي بالكلمة اللي يذكرونه
عادة اهل الطيب ورفاع الحمايل=لو حكوا عن خصمهم مايظلمونه
او شواعير العرب واهل المثايل=كان قلبان الرذيله يفهمونه
والمفاخر له براهين ودلايل=وسكة كل العرب مايجهلونه
والسوالف عند زينات الجدايل=شغلة اللي بالرخى ثارت شجونه
أثر نيران الجبل تشعل شعايل=بالقلوب اللي غدت تطحن غبونه
من سباع بالجبل تاطى الجلايل=والثقايل لا بدت مايرهبونه
له تواريخ جديدات وسمايل=والعفون من العرب مايرغبونه