يألله ياعالم خفي السّريره= تجبر هوى قلب بدى فيه وسواس
والحال عن ضيم الليالي تجيره = وعن ماقف يفقد بها بعض الأحساس
والنفس جنّبها دروب المعيره= وعن المذلّة والردى وطرق الأدناس
نفسك تهينك دام إبليس شويره= هواه وشيطانه لهم بالردى ساس
جازه برغباته دروباً عسيره = من خوف لا تحتاج لأنذال وخساس
أحكم رسنها حكم حبل الظّهيره = شيباء ظهر منجوبه الهجن عرماس
تتلي عقيد ضايقته المغيره= ياتلّهن مع سهلة وقت الأدماس
بأرض العدى والخوف طوّل مسيره= يزمي بها راس ويسقط بها راس
والشّمس ضايقهم صخاني هجيره= حفياوطفيا من الدّرك صابهم باس
تظهر خفاياء الرجل شرّه وخيره= تقدم بها ناس وتفهق بها ناس
وإلا الرخاء تكثر نخاوي أمطيره = كلاً شجاع وكرمته ماله أقياس
رجل اللوازم بالشدايد وغيره = ياجن بها خمس على خمس بقياس
والهجن تظهر طايله من قصيره= رجل يهاب الدّرب ورجلاً لهاداس
أحداً بفعله تفتخر به عشيره= يثني ورى ربعه والأرياق يبّاس
وأحداً يجي محزوم فوق النّجيره= ماجاب علم الطيب ولا حاش نوماس
راحة ليالي طربته مع زويره = بحفلة فرح يقلط بها كل هوّاس
وغيب الليالي مايعلّم نذيره = وطرق المراجل ماتبي درس ودراس
ترجمت مؤجز خبرتي بتعبيره= لجيل ورانا نكتبه له بقرطاس
وصلاة ربي عد رشق المطيره = وعداد ماذعذع من الريح نسناس
على نبياً بالمحاسب مجيره =راع الشّفاعة بموقف تحشر النّاس