حي الكتاب وحي راع الرساله=حيّه وحيّه عــد ما قايـمٍ قام
وعداد صرف الراجحي من حلاله=وعداد ما دارت على الناس الأيام
وعداد ما طش المطر من زلاله=وعداد ما سارت على القاع الأقدام
بالليث أبو طارق عريب السلاله=معرب ما بين خاله الأعمام
خالي وكلٍ يذكر اليوم خاله=زيزوم في ربعه مجرب ومقدام
يا حي فال الخال يا حي فاله=لعيون خالي والله إني فلا نام
من يوم جتني من جنابك رساله=البال صاحي والقوافي له إرزام
وخذيت لك من شرد الفكر هاله=مرباعها ما بين فكري والأحلام
يا راكب اللي يا مشى واستوا له=جيب جديدٍ للصعيبات جزام
المفخره يا حي ذيك الزماله=بين القزوز إليا دعس يحصل اشتام
عبه من الأكتين ومــرّ البقاله=وخذ ما تبي حيثك على الخط عزام
يفز لك فزت عقيد الطواله=وإليا أحترف ردة بنيه إليا زام
ودكه توجه يم عروسة شماله=حايل عساه تسيل عام بثر عام
ملفاك ساس الجود رمز الجزاله=شريف وافي لصعيبات فصام
معروف يرخص للمكارم رياله=راعي ولع لصّيد مشفي وروام
المحترم في خوته و الزماله=لا هو بلا هماز ولا هو بنمام
يكرم ولو هو من معشى عياله=صالح ابن فارس على الطيب همام
أما عن اللي قال فالقول قاله=والحر مثله يدرك العلم يا حام
كلٍ سلاحه يا بغى الصيد شاله=والناس ما يردعه تشديد الأحكام
ولا يرحمون اللي ترضع عياله=عيالها وفروخها صاروا أيتام
وقت التكاثر ما رحم من قباله=محشوم ومن يسمع عن أفعال الأقزام
وصلاة ربي عد مرزم خياله=على النبي المصطفى راع الأنعام