البارحه قلبي تصافق خفوقه=طوارين تقبل وتقفي معه غاد
لولا مغاليق المحاني تعوقه=ساير مطافيق الخلايق ولاعاد
واليوم ليه لازماً صوب لوقه=من دونها مالي امريّح ومقعاد
اما اسرجو صفر الخيول السبوقه=والا على عوص النضا شدو شداد
لعيون من دمعه عشاه وغبوقه=مصيونةً ماخايلت كل رعاد
ترجي لها علماً على الله اوفوقه=الياس دونه والرجا فيه من غاد
ترجي شفق شمسه وبزغة شروقه=رجوى الضرير لشوفة وجيه الاجواد
وتنوح نوح الراعبي في عذوقه=باح الكنين ولابقى الا التوجاد
جابت جمل حمل المفارق تسوقه=عليه من جور الغلا ثقل وانكاد
تقول ذي حملة غلاي امعيوقه=يابن بلي قلبي تبجد تبجاد
كزه لمن عاهدت نفسي مابوقه=كزه فدو راسك مطافيق الاوغاد
من لام قمرا ماكتوت به يذوقه=قمرا خذت من حد رمح ابن شداد
يابنت من كيف النشامى ريوقه=اللي تذارف دلته بن وقناد
*اسمه وعنوانه ونيه صدوقه=وبعون رب الكون لي معه مقعاد
ان كانت سلوم النشامى تشوقه=لاجيه بسلوماً قديمات وجداد
وان كان له في جمع الاحوال توقه=لنشر لك الفرحه على روس الاشهاد
والا الحقي طيراً تنحى سبوقه=وش عاد ياطرد المقفين وش عاد
مثلك الى زل الغشيم الطّروقه=لك ياعذاب الغيد بالعرف ميراد
يابنت لك ساسً جويده اعموقه=شمر الى ثار الدخن ملح وزناد
والى احتزم راع المشوك لنوقه=حماية الوضحى مغفلة الاذواد
رجالهم يمشي الكرم في عروقه=كم حايلاً ينثر شحمها على الزاد
وتمت بعنوانه ونيه صدوقه=وبعون رب الكون لي معه مقعاد