أخذت من الزمان اربع عقود ٍ والحياه دروس =ولامن شانت ايامي طلبت الله يزيّنها
أسافر في خيالاتي ويسيّر فكري الهاجوس =وحياة الشخص تتقلّب مافيه انسان يضمنها
ركضت بدنيتي هايم اعيش بوسطها واحوس =أجيها مر تتعبني ومر تقول مااحسنها
طلبت الله يعدلها دعيت الواحد القدوس =وماغير الله سبحانه يعرف الناس وش منها
أمرني هاجسي لا اكتب عن الواقع امر محسوس =واقول الناس ياعالم ترى تفرق معادنها
على البحر الطويل اكتب ماهو كامل ولا منكوس =بيوت ٍ اعتني فيها واراعيها واوزّنها
أفل الطرس واكتب به واصبح دفتري متروس =بيوت ٍ تحمل افكاري ابد مايوم اركنها
عن الدنيا ومافيها احد صاحي واحد ملحوس =يهيم القاف واسترسل شعوري غصب يعلنها
وشفت الخلق تتفاوت احد طيّب واحد منحوس =وجل الله سبحانه يعرف اللي بواطنها
يبين الرجل بالموقف ويظهر راعي الناموس =تحقق مطلبك دامك على الوافين تزبنها
ياكم شاقي مع الدنيا ركض في وسطها مهووس =يحسب ان الحياة المال صلاته مادرى عنها
حشيمه ماحشم نفسه ضعيّف لو رأس مرؤس =ولامن قال له كلمه خبيل ٍ مايثمنها
علوم الطيب ماجاها يشابه بالردى للسوس =على النمات بني ساسه حكاوي الكذب لوّنها