كيف ارتفع في وقتنا كم هلباج=وذلوا رجال ٍ ياجماعه كريمين
والطيب ضايق ودّه اليوم مخراج=وصار البخل محمود عند اللئيمين
وبعض العرب في وقتنا دون منهاج=واهل الردى ياكثرها صارت تبين
كيف الغني في هالزمن صارمحتاج!=يأخذ لو انه في حسابه ملايين
محروم عايش في متاهات واحراج=من شاف لبسه قال وشفيه مسكين
يسبح على بحر المذّلة بالأمواج=وفي موتته حتى عياله سعيدين
ياللي مسكت المال مربوط بأدراج=وش ينفعك مادام عمرك ثمانين
بكرا بتحمل للمقابر على ساج=ويعرض سجّلك ماحوى الزين والشين
واستثني اللي فعلها الدر والعاج=قوم ٍ تصّدق بالخفاء للضعيفين
تعطي ولاهي تملك قصور وابراج=تعرف تقول الدار مابه مقيمين
وترى الحساني راعية توّج بتاج=يجني ثمار البذل محفوظ بعدين
والختم صلوا عد مايحرم الحاج=على محمد خاتم ٍ للنبيين