= ( الألف )
ألف أولف من كلام بترتيب = قيل على درب القدا والمواجيب
أظن مابه منقدية ولا عيب = كلام احلى من طعم درّ الأبكار
ابكار بكّر بالزمان اختلافي = دور على الأجواد مابه عوافي
اقفى وخيله بس تركض مقافي = ياما سهج من خيّر طاح ماثار
= ( الباء )
الباء بعيني شفت شيٍ هوايل = شيٍ يهيل العقل عدل ومايل
تذكروا ياأهل القلوب الهبايل = باللي نزل في جزء عم والأسطار
أسطار سطرات الليالي تلوعي = ياما وطت من حاكمٍ له جموعي
بالكون قومه يلبسون الدروعي = راحوا ولا منهم بقى كود الأذكار
= ( التاء )
التاء تفكر بأمر دينك ودنياك = تر ماوطى الأول لزومٍ ياطاك
لاتحسب ان الموت يسهى وينساك = تراه حتمٍ كود يسقيك الأمرار
أمرار ياجاهل ترى الموت سنّة=احسن بيسرك فبل عسرك يكنّه
وافهم نبأ ما أقول لاتحسبنّه =سوالفٍ يقولها كل هذّار
= ( الثاء )
الثاء ثقيل اليا ثقل رأس مالك = كلن يبي قربك ويرغب قبالك
واللي تبي لو ما وصلته عنالك = وان قل ماعندك خطيرٍ من العار
عار تعيّر به يقولون يالهيس = وتصير بعيون العرب كنك ابليس
لو انك تجدع بالدبيله ملابيس = غديت ماتسوى ولاربع دينار
= ( الجيم )
الجيم جنّب عن طريق النميمه = والكذب والبهتان هو والنميمه
لو انت تأخذ من وراهن غنيمه = مذكور ان أصحابهن هم هل النار
نار خلق ضده نعيمٍ مقيمي = حدايق الفردوس ضد الجحيمي
خلاّقها محيي العظام الرميمي = جنات عدن يجتبيها للأبرار
=( الحاء )
الحاء حدث دورٍ وأمورٍ غريبه =شيٍ قبال العين ما ينحكي به
كيف الفتى ينهج يطالب نسيبه =يامن خبر ياللي للأدوار خبّار
خبار من خلقت وطاه وسماها = ماقالوا الأجواد باعت نساها
صارت تجاره والمكاسب وراها = بيعن مثل بيع العبيد وهن أحرار
=( الخاء )
الخاء خسر من يبذل الطيب باللاش =مثل الذي يدفق صميله على الطاش
يبي يزيّن ماء البحر مار ماباش = لو هو يزين مزيّنه كل مدرار
مدرار مادري الردي بالجميله = إنه مع الطيّب سواة العديله
اليا إحتجتها من دون شكٍ تجيله = تلقاه عنده مانواه بالانكار
=( الدال )
الدال الدنيا يكفي الله شرّه =تقبل وتضحك لك وضحكه مغرّه
ياما تمكّن ثم توريك حرّه =تقلب عليك وتسمرك لك بمسمار
مسمار مسماره يفك الحديدي = ماتلّحق اليا أقفت مداها بعيدي
يبيد طرّاده وهي ماتبيدي = وتعرّض اللي يطرده درب الأخطار
= ( الذال )
الذال ذلّت للولي كل قوة = وذلّت من الأنذال أهل المروة
أمرٍ غريب ٍ ماحدث كود توه =هل الندا صاروا عباة وهم أمّار
امّار مار ان الاماره لها ناس = ماتستوي للي يبيها بلا قياس
تبي مع التقوى جدارٍ على ساس = ولا حدٍ ذكر من دون ساسٍ بنى دار
=( الراء )
الراء رأيك يافتى لايغرّك = جنّب عن الرأي العمى لايضرك
اليا صار قبل عادته مايسرك =خلّه وتلقى مع صليبين الأشوار
أشوار شاور من برأسه شكاله = صمصيم رأس الشور حلحيل قاله
اللي اليا جيته على كل حاله = فتلّك الرأي المضوفر بالأفكار
=( الزاء )
الزاء زلاّت الرفيق اغض عنها =تر سامح الزلات يعطى ثمنها
لاتجادله تبلش بتالي شطنها = مجادل الأقراب مابه لك افخار
افخار تفخير الفتى من نصيبه =ان جاد حظه صار مامثل طيبه
واليا تردى بان للناس عيبه = والحظ تر مابه طباخٍ اليا بار
=( السين )
السين سدك ودّعه من يضمّه = وديع سد ما عطى سدّه أمّه
رفيقك اللي هم حالك يهمّه = لابأس يصلح بينكم كشف الأسرار
أسرار اليا منّهطرالك طواري =تعطيه غاية مقصدك ماتداري
ومن عاش ماله في زمانه مباري =دزّه عمى رايه بغبات الابحار
=( الشين )
الشين شر الناس لافات خلّه = جنّب عن الشاشات واترك محلّه
وش قال راع القيل يا فاطنلّه=ينصح بقيله عن طواريق الاشرار
أشرار تر الشر مثل الشراره = ان طبت الغابه يزود استعاره
صارت دخاخينٍ يهوّل غباره =ويكبر لهبها اليا تقاربت الاشجار
=( الصاد )
الصاد صبرٍ بالله المستعاني = الصبر مفتاح الفرج والأماني
صبر الفتى له من خيار المعاني =وابو زويد قال مافيه تعبار
تعبار ناظر وش يقول المهادي = الصبر مذكور عليه اعتمادي
هذاة شيٍ يالسنافي وكادي =به تكسب القدرة وبه تأخذ الثأر
=( الضاد )
الضاد ضدك اليا تلاين جنابك = يضرب عليك اليا مشى مايهابك
يرمي بحيلاته يدوّر ذهابك = حولك يحاول حفر شركك بمحفار
محفار محفار العدو البطيني =يقرص كما العقرب وهو مايبيني
ابعد عنه لاتجعله لك خديني =لا تأمنه حذرا ترى الضد غدار
= ( الطاء )
الطاء طلبت اللي على الخلق عالي=طالبك يامعطي العطايا الجزالي
يارب مقصودي يزين أعمالي = ياباعث الأرض المحيله بالأمطار
أمطار بأمرك مزنها يستهلّي =ياملحق العظم الهزيل المتلّي
ياللي لحكمك بالغداري نصلي =أسأل منك العفو ياوالي الأقدار
= ( الضاد )
الضاد ضيفك حيّ به يافتى الجود = وصغّر له النفس الكبيرة عن الزود
وقلّط له اللي بين اياديك موجود = وقلّه مثل ماقال بيطار الأشعار
اشعار شعّار بيوته بياني = ثلاثةٍ خلّك لهم مرحباني
ضيفك وجارك والخوي الهداني =لابد ماكلّن يسولف باللي صار
= ( العين )
العين عن من ينقل الهرج ريبا =لو عنده آيآت تحسبه خطيبا
تراه على الكلمة سواة الرقيبا =واليا سمعها حطها كبر سنجار
سنجار سمكري السوالف يزيده =يغويك زوله بالهدوم الجديدة
اليا ماتعرفه تحسبه وليدة = وهو نجس أنجس من جناحين اباذآر
=( الغين )
الغين غاب الذهن اليا أفكرت بالناس = مالونها واحد طبوعه والأجناس
منهم كما الفضة ودانات ونحاس =الاسم كله ناس وعقولها أطوار
أطوار بأرزاقه وفرق العقولي =مثل الحفور الطامنه والتلولي
وأحمد وصفهم بالمعاني يقولي =منهم تنك يبرق على جرم فخار
= ( الفاء )
الفاء فراق اللي فراقك يريده = فرقاك عيدٍ له وفرقاك عيده
لاتقاربه ترضى لنفسك زهيدة =ارحل وبدّل منزلك عنه بديار
بديار أجاويدٍ كرام حمايل = اللي لهم خط ٍ على الناس طايل
أهل المروة والندى والنفايل =اللي على العليا قديمٍ لهم كار
=( القاف )
القاف قل للي يريد المديحي =اللي شفيٍ بالمراجل يشيحي
يتعب على الطولات مايستريحي =يحط حوشه بس بكتار وبهار
بهار بذل النفس والمال قادي = اليا صار ماتبذل بطرق الفسادي
النقر بأسبابه وحوشٍ تصادي = اليا جهلت افطن لبيت ابن عمار
=( الكاف )
الكاف كن بحكمة الله راضي =تر المقدّر ماعليه اعتراضي
شيٍ يصيبك وين ماجضت جاضي = خلّك لحكمة مالك الملك صبّار
صبّار تر كثر التشكي سماجه = والحكي بالفايت وكثر اللجاجه
نقصان عقل ولابهن قضي حاجه = كود التصغّر والتفغّر والادبار
= ( اللام )
اللام لاترضى لنفسك هزيعه =عزّه عن التدنيق خلّه رفيعه
واللي يدوّر هكعته لاتطيعه = تصير طيرٍ قص ريشه ولاطار
ماطار ناظر وش يقول ابن حشاش =لاتحسبن الطير ينتف وينحاش
تراه لولا الريش جزمٍ فلا عاش =الاّ ولاأظن يتقماه صقار
= ( الميم )
الميم من ينقل من الكبر مثقال = ورد خريفٍ من لظى يشعل اشعال
ماينفعه تزيين عذره والأقوال =عند الولي ماينفعه زين الأعذار
أعذار راع الكبر ماهي مليحه = يوم المحاسب والمعاتب قبيحه
راعيه يبشر بالشقى والفضيحه = الكبر حبله للمياهيف جرار
= ( النون )
النون ناسٍ مشقيه كثر ماله =كلّن يحسّب بالسنة وش غداله
ألهاه كثر الحوسبه عن أعماله=يما وصله الموت قصار الأعمار
أعمار ياما عمّرت من عماره =جابوا له الاستاذ شمرخ جداره
لابد عقب الشمرخه من دماره = لو جوًدوا بنيان ساسه بالأسوار
=( الهاء )
الهاء هواي الفوز يوم الحسابي =يالله عطني في يميني كتابي
يامهوّنٍ كل الامور الصعابي = ياواحدٍ حكمك على الناس ماجار
ماجار حكمك ياوسيع البنايق = يافارج الضيقات عن كل ضايق
ياعالمٍ بإجلالها والدقايق = يامطعم الداب العمى بلج الاطيار
= ( الواو )
الواو واللي له نصلي بالاشراق=الواحد اللي رافعٍ سبع الأطباق
اني فلا قلت التماثيل ملاق=حتى يقال فلان بالشعر بيطار
بيطار بدعي للمثل يوم فكرت =وعن مايشوفه ناظر العين عبّرت
للي غدا عن درب الأجواد ذكّرت =والله ذكر بالشعر حكمه وتذكار
=( الياء)
الياء ياعل اللي سمع هالمثايل =تصير له مع كل دربٍ دلايل
يضرب طريق الرشد ان كان عايل=ويترك طريق أهل النمايم والأشرار
أشرار شرّيت النصايح بتصطير =دلايلن للي يبي مسلك الخير
وصلاة ربي عد مارفرف الطير =على النبي الهاشمي سيد الأبرار