بديت باسم اللي له النّاس راجين= يرجون عفوه وثم ترجى نفوعه
مع قدرته قدرة عباده ماهي شين = يرزق رحيم الخلق ويرزق قطوعه
يحلم عليهم ويدمح الشين بالزّين =واللي يتوب الرب يقبل رجوعه
ومن بعدها سطّرت لي وقم بيتين = هاض الغرام وشاق بالي بدوعه
القيض راح وميلن الكليبين= وسهيل بالحسبه اكيداً طلوعه
والوسم بحسبتنا بقاله اسبوعين= غيّر هواء الصّرفة برادٍ يلوعه
تجهّزوا للبر ياهل الشياهين = ياقالوا الرّمثي خضاراً فروعه
شمة نسيم البر مع طرقة العين= وتشوف عشب مخضراً مع جذوعه
ريح الخزامى مثل ريح الرياحين = حزّت غروب الشّمس وإلا طلوعه
قالوا تروا وقت السّفر يوم الأثنين = لدارٍ نباته مثل خضرة زروعه
برفقة عزاز وكلهم لي قريبين = المرجلة منهم تعلم طبوعه
نمشي على دار به العشب شكلين = ماطال من عذفاء يمينك نجوعه
فوق اسرد ماقاصده بالثمن دين= نقد دفع به لين تمم بيوعه
أسم خبيره مبرمجٍ وله عناوين = بالخلف يكتب وفي مقادم شموعه
صنعة خبير به صفات الفراعين = لكن يشكر بحرفته مع صنوعه
ياما اتقنه بالزّين وازين من الزّين = بشغله تميّز عن خبايث طبوعه
وأنت اشتره لأرض تقل به براكين =بيض الطّعوس اللي تهايل دموعه
يادست له تغيّر الصوت صوتين = صوت العديم اللي تقدّم جموعه
مع النّفود اللي رماله كثابين = أرض تضاريسه هيار وقوعه
أرض خبير القار ماداج به زين = إلا واكيد مابعد شاف نوعه
ياشاف طلعاته غداء الوجه لونين = عاف المكاسب وعاف زايد طموعه
حر البساتم وصوتهن بان ياحسين = نفسه جزوع وسايقه به جزوعه
جر الدّبل له وبدل الظّغط باللين = لا تنشحن لوماء الأديتر يزوعه
نبي بعيد عن حيات الغثيثين = وبحوث قالات تشعّب شروعه
نشغل بها نفس ترسّه شواطين = ومن المغثّة شايناتاً طبوعه
وعمر الفتاء لوطال ملفاه للطّين= بقبر ظلام ماتولّع شموعه
وصلوا على من جاء بطه وياسين = صفوة قريش اللي برز في طلوعه