في ذمتي ان العذاب بيوم ماصابك=اللي رمابي جهنم يوم تجفيني
في ذمتي صحت بأعلى صوت لحسابك=قلت ألعن الكون كله وانت ناسيني
ياللاسف كنت انا العالم تحدابك=لانك اعظم رجل في قلبي وعيني
لانك انسان مات الحي بغيابك=لانك انت الوحيد اللي مسليني
ياللاسف قلبي اللي ضاع بترابك=دسته باقدامك ولاحسيت ابد فيني
كنت ارفض اكبر رجل بالكون وارضابك=كنت احتقر كل من قلبه يناديني
ماكنت احسب حساب خيانة اهدابك=يومه تجف الدموع وتنهمر عيني
لو ان جرحي دقيقة بس يسطابك=تعاف كل الملا والكون وتجيني
لو ان جرحي يذوب بقلبك احيابك=تسعين وادي عذاب جروح تكويني
كرهت حتى هلي والناس بأسبابك=كرهت حتى اللي يحاول يسليني
غطيت عني ضياء الكون بأحجابك=وحبيت حتى ظلامك يامعنيني
من يوم نبضات قلبي تطرق لبابك=ماشفت غيرك ولاحياً شغل عيني
وهذا جزاء من جميع الكون يفدابك=نسيت حبي وشمتَ الملا فيني
والله ماسامحك حتى تلاقابك=عند الكريم اخذ حسابي ويرضيني
يوم المحاسب اقول اليوم وش جابك=اليوم ماعاد ينفع لاتحاكيني