ان انكر الصوت عند الله صوت الحـميـر= وان اقبح الفعل عند الناس قذف النسب
وش عذر فرعون بعد انه لفاه النذير = وش اودع امرأة ابو لهب تحمل الحطب
غير انهم من هل الألحاد و اهل السعير = وان الله اراد وان الله بأمره غلب
البارح الليل يا هايف قضيته سهير = ولا يسهر الرجل يا هايف بليا سبب
امضيت ليلي بحال(ن) كني المستجير = عن حر حام الهجير بحر حام اللهب
اسديتها للضمير وضاق فيها الضمير = وإن قلتها للعرب لامت عليّ العرب
جنبت نفسي بنفسي كل ماهو مثير = بس العرب تبتلينا مثل بلوا الجرب
املك ورا قو صبري سيف شعر شطير = وأفهم اذا كان واجب واعرف المستحب
من وين باتي بصبر(ن) دام صبر البعير = يلحق عليه القراد تشوف كبر العجب
ياصانع الطيب ماللطيب عند الحقير = اي مقابل بطيب ألا يزيدك تعب
مدري تبي تزرع الصبخا وهي ما تصير = ولا تبي من غصون الشوك تجني عنب
يا صيب راس المدير وخف وزن المدير = عن منهو ادنا من المسؤول كف العتب
يا صار راعي بيوت الناس طقاق زير = شيمة هل البيت رقص ومات عنها الأدب