اشهد انه صدق بذر الورد يثمــــر ورده = والبصل يثمر بصل مايثمر الريحانــي
ولايجيك غزيّلن من بين قرد وقـــــــرده = وماكرالغربان مايطلع منه شيهانــــي
والفرات العذب يبشر بالــروى من يرده = والبحور الهوج ماتقطع ظما الظمياني
ومن شعم نار الغضا يدفا ويقضي بـرده = وعمر نار الليف مايدفا منه بردانـــــي
وكل من كثّر كلامه واستمر بســـــــرده = صار عرضه ينتقده افلان والا فلانـــي
الرجل ماينجرف مع عالمن ممــــــــرده = ايترفـّق لايزفـّه هايج الطوفانـــــــــــي
مايعيب الرجل ملبوس القديم وجــــــرده = الملابس مابها مقياس للغلمانــــــــــي
ولايعيبه مركبه لوكان يركب خـــــــرده = العمل بالساس ماهو باقي البنيانـــــــي
الرسول المصطفى مايملك الابــــــورده = خير من داس الثرى يمشي بلاحذيانـي
يلتحف في بردته وقت الشتا عن بـــرده = وكم ليله بات فيها المصطفى جيعانــي
لاتقلّد عالمن بهروجهـــــــــــا منجـــرده = يوم زاد الخير صارو قمّة الفرسانـــي
يذبحون ويصلخون وبالصخا منفـــــرده = صايرينن مثل حاتم مدهل الضيفانـــــي
وبالملاقا يقحمون المعتدي في طـــــرده = مثل بن غانم الى جا ساحة الميدانــي
ايتحلّم في منامه واستمــر بهـــــــــــرده = وصّله شيطان حلمه قمة الطغيانــــي
كل مسلم ماقرا قبل المنـــــــــام بــورده = يعتبر ضايع ويفتح باب للشيطانــــــي