مبدا كلامـــي بالسلام وتحيه=للي يرحب دايماً في ضيوفه
أهــدي لطلاب المعالي هديه=للي تولع بالمراجل شفوفه
للي يبون المدح عندي وصيه=تروا المراجل بالصعاب محفوفه
مايدركه اللي عزومــــه رديه=عسرا مثاله كايدات ظروفه
المـــدح مايقــواه عفن دهيه=عن الطيب والولات تقصر كفوفه
تبي شجاع الليث باسه قويه=يصبر على الشدات لو به كلوفه
مثل المبلع يوم يلحق خــويه=رجلي وحافي والزماله كتوفه
ينقل خــــويه في ديار خليه=سبعة ليالي والضواري تحوفه
من العطش ماطاح من معنويه=يمشي اسبوع الزاد ماطب جوفه
من رملة الزلفي لشرق الدويه=وسبت المواطي طايح من خفوفه
به الشجاعـه والرحم والحميه=فدى بعمره دون ذكر معروفه
والاش لو انه حـــــدى والديه=مايلتفت له جعل بقعاء تلوفه
أفعال أبو ملوح ماهي خفيه=مع القبيله شايعه ومعروفه
مجزع رفع هامات من له دنيه=تنشر له البيضاء وكل يشوفه
صلوا على المختار محمد نبيه= خمس الفرائض بالمساجد صفوفه