اسألي عن نبض قلبي لا لفى حي الغدير= والمخارج والشوارع واسألي كل الرياض
لالفيت الحي كن الروح من جسمي تطير= واسأل أنوار المنازل نور بيتك وين ناض
وألمس أطراف الحدايق والتمس منه العبير= عطرك المختال مرّ ومن طهر هالشوق فاض
رغم إني مالقيتك وأختبط كني ضرير=قمت ألف الحي كله لين شفت الحزن خاض
وصاحبي يسأل على وجه الصدق وضعك خطير=وأنت من عدة شهور فايته والحال قاض
لاتجي حي الغدير وعندك من الروح بير=وش تبي في هالرياض الممحله رح للفياض
ولاتحسب السالفه بتمر في قالب يسير=وأنت كن الدمع في عينيك ياصاح أستشاض
وصرت أشوفك تكتم العبرات وأحياناً تثير =كل حرف وكل لحن وكل مافيك أمتعاض
قلت له : وقف على كف الأمل قلبي بخير= ماتضيق بداخلك حتي تفجر وأنت راض
كيف لا وفي يديني من مسا البارح أثير=عانقتني بالرسايل شوف حرفي حيل هاض
بين ليه وبين كيف وبين عله مايصير=وذكريات أرقت عيني وصيحات أعتراض
ولاتزال مفاوضاتي جاريه ويالله خير=والمشاعر تنتظر حكم الشعور وليه غاض
ومن حقوق إنسان واعي حق تقرير المصير= ومن بغا يقطف وروده يلسعه شوك الحياض
وأنتهينا عند أبيك وغيبت شمس الهجير = وصار ظلي فالزمان وصرت روحه والرياض