ياحافز اسمع وش تقول الناس عنك يابخيل=انت السبب لو صاربه فوره ياسيد العارفين
قلتو اعانه مير صار الوضع اهانه ياهبيل=ياليتنا منك ومن دوخت شروطك سالمين
كم عاطل وكم عاطله فرحت وتتحرى الحصيل=وصدمتهم في قولتك كنتو ياناس مسافرين
مسافرين ايه كنا من قبل وقتن طويل=مسافرين ايه كنا للعلاج مدورين
والا زياره للقرابه في زواج اخوٍ اصيل=وشوله تفكر بانه زود مال ومسرفين
واللي حصل منك على عرض ووظيفه ياهزيل=شغلته صارت في حلوق الناس نكته شامتين
مثل ام خالد يوم جاها العرض في وسط الشليل=قلت الوظيفه بالمقابر للوفايا تغسلين
والا بعد عرضك لابو بندر وهو رجلٍ عليل=يرعى الحلال بمزرعة تاجر رفع سعر الطحين
واللي رزقه الله اعانه منك لو انه قليل=صارت ديون يردها لامن توظف ياذهين ؟
من جدك انت ياحافز؟ والا ترى مزحك ثقيل=الناس من مزحك بدت تزعل يبو عقلن فطين
الله رزقنا حاكمٍ لا قال قوله مايميل=قال اصرفوا للناس وانتم يالبطانه مخملين
عقدتوا الشعب السعودي بالشروط وبالكفيل=حتى ترك حقه..وهذا انتم عليه مخططين
من شان تاكل حقنا من دون علم ولا دليل=والا اتقاسم حقنا بينك وبين المجرمين
هذي خيانه للوطن اكبر من فعول العميل=هذي ترى بالدين حكمه حكم ناسن مفسدين
ياموطني ياموطن الخيرات والدين الفضيل=صحصح ترى ذولا مهم لارضك ودينك مخلصين
حنا نحبك ياوطن حنا لك حزام وفتيل=حنا نبيك تشوف حل مع هذول الخاينين
الشعب كله ياوطن في وجه ابو متعب دخيل=مدامه القايد فحنا دوم فيه ماملين
نبي نتسنع ياوطن ولا نبي غيرك بديل=هذا مراد الشعب وانته سيد كل العارفين