عسى المزنة اللي بالسما ضوّها مشبوب=إلا جت على غيد الخشيمي تنثّر ماه
تجي ضفوةٍ والمي من فيضها مسكوب =تجارى "تلاع مقيد "من صيّبٍ يغشاه
مداهيل غطروفٍ غدا القلب له مجلوب=غريرٍ يتل اهل الهوى جل من سواه
ألا ياحمد قلبي مع الجادل الرعبوب= تولعت به يابو محمد دليلي تاه
اليا ابطيت ما شفته تشافيت بالمشذوب=ابارقب على داره واراعي حوال حماه
إلد النظر وارجي كما اللي يدور ذهوب=صويب الهوى!! لو هو تداوى غميقٍ داه
ذبحني بطرفٍ قاطعٍ لفتة اليشبوب =.ومفتول قدٍ ينثني للترف حلياه
إلا شفت زوله قمت أروّغ تقل مسبوب=أغرّب شمال ونيتي هاجسي يقداه
سلوم الوناسه قبلنا دربها مضروب=مشو به صناديدٍ ولا عابهم ممشاه
وانا حالفٍ عن طردهن يا حمد ما توب = ياما ان الولي يِرجع لقلبي سبيل هداه
الاقدار تجري بالعنا والعمر محسوب=مثل حلم ليلٍ لو يسرك مضى بعشاه
لو ان الليالي مرّها كدّر المشروب= .مثل ضاميٍ صدّر معيفٍ وكف رشاه
من اللي نشد سرحان عن رزقه المكتوب= يبيت القوا ويبيّت الجوع بين شواه
نبي ساعةٍ تصفي نعيشه طرب وعجوب= والايام غيبه خافيٍ ما نعرف اتلاه
ما دام انّها مضوه وجانا منه مندوب= نبي ناخذ الحاظر وباكر على مولاه