رجل شاعر يبلغ من العمر أكثر من 85 سنه حاد البصيره ضعيف البصر ... هو :
( محمد بن فدغم اللوح الوهبي الاسلمي الشمري ) .. يقول هذه القصه بأحد المجالس عندما أخذ اجازه من دوامه .. وكان شاعرنا يعمل
" خوى عند أحد ألامراء " قبل اكثر من ستين عاماً في اول حكم الموحد الملك عبدالعزيز بن عبدالرحمن ،، وأستأذن من معزبه لكي يذهب الى اهله في حايل وكان اهله يقطنون ( قرية المضيح ) بالطارف بجبال سلمى وعندما قرب المقطان وقرب الصفرى مرض
خويهم ويدعى ( نهير السهلى ) الذي كان جار لقبيلة ( الوهب ) فصنعوا : له نعش لكي يحملوه من المضيح بحائل إلى رفحاء > وموقعها في
روضة ( الخّر خر الشمال ) بجانب
العويقيله شمال ( رفحاء ) انذاك "150كم" على طريق ( رفحاء عرعر ) وعندما يتم تنزيل خويهم نهير تنزل ( قبيلة الوهب ) ويربعون ويصيفون في الشمال ثم يعودون الى ديارهم المضيح حاملين جارهم السهلى على اكتافهم ايضاً ورجال القبيله تساعد بعضها البعض في حمل نعش جارهم السهلى ...... وشاعرنا / محمد اللوح ،، ضاق صدره بعد رحيل معظم القبيله عن مقطنها ويبقى بعض من رجال القبيله ليس لهم حلال ( وشاعرنا هذا) يذهب الى (( رجم )) قريب من بيوتهم ويتذكر ربعه يوم يروحون يم رفحاء ويفيض العبرات عند هذا الرجم ويشاهد أثرهم يوم يشيلون ( خويهم نهير ) ويوم تمشى المظاهير ويفرح ( الشاعر ) ويسعد ويفيض عبرته ويجيئ عائداً الى اهله وفي بعض المرات ذهب الى الرجم فلم يجد اثر ،، ربعه في مكانه كاالعاده ضربته سحابه غريبه وغيبت الأثر !!
( فطنا ) 😥 شـــاعــرنا !

ثم أنشد قائلاً ...

ابوك ( يارجم ) قصر دونك الشـــوف =يلعبك الشرقي مشف مشافي
رجم طويل ويسهجه كل عاصوف=تلقى على ركونه ذواري سوافي
يارجم ماعينـــت ربـعاً بهم نـــوف =ونفوسهم للجار تودع اضــعافي
نهير على العمدان ينقل على كتوف=من عرض ماسووا زمول الجزافي
فكاكــت المظـهور نــــزالت الخــوف=بمصقلات الهـند خـضر رهـــــافي
البارحه مانمت انا الجفن مطروف =قامت تـخذف دمعتـي بانـطـــرافي
دوجت بالبحرين و جينا عـقرقـوف=والطـار باليــمنى عليــه انـتســافي
ولا ينوخذ شيً على غـير تصــروف=الحـــمد للـــباري عليــم الخـــوافي
رزاق هلـباجاً على لحــيته صــوف=ماقيل من بـعد المنـــاطيس لافــــي
عربمب ماله يودع الــعفن منقــوف=قلــط على اللي يحــتمون المــقافي
تلقاه بالمجلس طــوف وراء طـــوف=مثـل البغــل بطــنه كبيــرآ وعــافي
يراكـــب من عندنا فــوق منحـــوف=عليــه مـــن دل المناعـــيـر ضـــافي
يسبق خفيف الريش صعفاق مجلوف=خطم على كــدر الحــمام الخفافي
ماشاقني خد ،، من البيض مشنوف=أغضي عنه ياما حصل لي عــوافي
شفي زلازل لابـــة مابــهم خــــوف=ذرفــــينٍ .. ذريــــفٍ عيـــــال ذرافــــي
اخص بها النشمان ربعي بهم نوف=تناشدوا دوجات حـــم الـــشعـــافي
وأقفــو كما صيداً على بعد ملقــوف=ياصــــكة الـــتفاق عقـــب التـــفاقي
ربعي بني وهب على الضد ذايــوف=ياغــــار هـــوش مقـــلبــين الدفافـي
هل اللحيسه واســآلوا كـل عـــاروف=ياكذبـن خــطوا الكـــذوب الهـــلافي
شفي قطيع فوقه الوســـم مجـــروف=ومـثولث يدعي الخـــطاطير دافــــي
ودلال عنها صــالي النــار منســوف=يطبـــخ بـها حـب من الــبن كـــافــي
ونجرن يهضول بين الاوقات مكــلوف=يوعــي ثقــيل النــوم لو كـان غافـي
مع سابق تشدي من السفن شاحوف=يتلنـــها الــعيرات قـــطم الخـــفافي
فوقه قصــير يودع العظم مســــعوف =روض حـــديده يودع الصب صافي
ونشـمية قرنه على الـــمتن منـــسوف=تفرق على بيــض العذارى العفــافي
امشي ديق ماني على الكيف منـكوف=ياعاضــبوا هزل الرجــال الـعرافـــي
لابـــد من قبـــرن به اللُـــبـن مرصــوف !!=او تأكله ســـحم الفهــــود الـــهوافي !!
موتك عزيز في شفــى رأس شفـشـوف !!=آخـير من منــة رزيــــل انــصافـــــي ؟؟
وصــــلوا على محمد مســـاجيد ووقوف=واعداد مادار الــهواء بأنـــــصرافي

___________________________
<>الشاعر / محمد بن فدغم الوهبي الشمري <>.
رحمه الله .
ماذا كان يتمنى شاعرنا المرحوم يتمنى البساطه بكل شي بيت مثولث ونجر وجماعه ودلال ونشميه وحر نفسه ولاهو خوي مع أمير . رحم الله شاعرنا ورحم الله أجدادنا !! وكل هذه البساطه هي شغلهم الشاغل .
------------------------------
وكل قبيله من القبائل تفتخر بفخذها بما فعلو رجالها من انجاز عظيم من أشياء ترفع الرأس وكل وقت وزمن ومثل له رجاله وأبطاله ولا شك في ذلك .. وقبيلة شمر عفواً !! قصدي دولة شمر تفتخر والحمدلله بجميع الصفات والالقاب المميزه فبارك الله فيها دائماً وابداً .


هذا والسلاااام عليكم ورحمة الله وبركاته .

( منقووووول وبتصرف وبثقه شخصيه )