منتدى نشامى شمر - عرض مشاركة واحدة

07-01-2011

بسم الله الرحمن الرحيم

الإخوة الكرام أعضاء وزوّار شبكة نشامى شمر

السلام عليكم ورحمة الله وبركاته ،،

أعود لكم من جديد بآخر قصائدي وهي بعنوان " " ..

متمنياً أن تنال إعجابكم ..

الإلتفاته .. ..


	الله من قلبٍ كثارٍ طواريه=وعينٍ لها يمّ القديم التفاته جيت المراح اللي بطا الوقت ماحيه=إلا مشب نار العرب لا شماته تالي وجار النار والرّمل سافيه=ياما اشتعل ودلالهم حاضباته مضرب لهب ناره سطابه وصاديه=وجدت من تحت السوافي صداته ما أدنى وقوده راعي البيت شاريه=جروم رمث والنسا جايباته ومكان نجرٍ نازح الناس يدعيه=اللي سمع صوته تجيبه دعاته وطالعت بعيوني ثلاثة هواديه=طال الزمان وطوّلن ساكناته أذكر مصلاّهم وأنا معهم آتيه=وباقي من المحراب كِسرة حصاته بمفرّع الديرع بعالي نوابيه=متخالفٍ من كل شكلٍ نباته بأرض المرا والحمض عينك تراعيه=وتشم عطره بانفتاح زهراته والله تعالى يامر السحب تسقيه=من يِمّة القبلة يجن زايراته سيله على كل النواحي مكافيه=بالمرتفع يصفق على أربع جهاته نرعى نباته ونتجنى زبيديه=الأبيض اللاهق وداكن كماته هذا زمانٍ فات واليوم مخطيه=نشو السحاب وطشّته وبركاته جيته وأنا لي مدةٍ ودي أجيه=وملازمتني بالخفا ذكرياته لولا اشتياقي كان ما جيت ناصيه=وقفت به والصدر جر نهتاته ذكرني الموقع عن أخبار ماضيه=وأصابني في ربشةٍ وانبهاته وين الكرام اليوم ما هم حواليه=ما تقل هم جو به وداجوا فلاته عاشوا على مر الزمان وحلاويه=وطابوا على شح الزمان ورهاته عسى الولي يضفي عليهم حسانيه=ما يجازي الواحد بقدر حسناته ‍ الشخص ما هو كاملٍ في معانيه=من يدّعي ذلك ترى العِرف فاته وللواحد العزّة ولا أحدٍ يضاهيه=متفردٍ جل وعلا في صفاته أنهيت مشواري وردّيت مابيه=وعيني من الضيقة تهل عبراته وقلبي يتوق ويردعنّه محانيه=لولا المحاني فضّل الانفلاته رجعت والموتر مع الخط يطويه=والحصو يرمنّه عليه كفراته الخط صحراوي كثارٍ ملاويه=يضرب على شعبان متعرّضاته روّحت في جيبي على الخط حاديه=وبالخطة الخضراء مساه ومباته دار الكرام الغانمين المداليه=فضلان قومٍ بالسحاب هقواته قالوا مواليف ودويله وقلت إيه=‍فخذٍ جميع ألقابها زاهياته وأمير خطتنا عسى الله يبّقيه=عبدالكريم فعوله مقدّماته اللي فتح بيته وقلبه لعانيه=وتعجبك بشّت خاطره وتحياته الطيب صعبٍ وأبو نواف قاويه=دعا المراجل وأقبلن طايعاته وإن قلت شمر فعلهم ويش يحصيه=واللي دخل معهم كسب طايلاته والكون واسع ساكن الكون ماليه=والطيب أكف الأوفياء نايلاته ومن يامن الدنيا تغرّه وتغويه=لا تنجرف يالعبد مع مغرياته دنياك ما تاتي على ما انت ناويه=ما ينعرف هونه وشدة قساته تخلِف ولا تمثِل مثل ما انت باغيه=تدور ما بين الخلايق رحاته ونوبٍ تنوّر مسلكٍ كنت تمشيه=ونوبٍ طريقك تطمسه بظلماته ومن تضحكه لا بد يومٍ تبكّيه=كثيرة الميلات بتقلباته الله يدوم وكل مخلوق تفنيه=والأجل محتومٍ يحدّد مماته سبحان من يعلم بما كان تخفيه=‍مهما تكون صدورنا حاسباته من قبل لا نفسٍ على الناس تبديه=نفسٍ توسوس به بحزة سكاته حي سواد الليل ما عاد يغديه=عن نملةٍ سوداء بسوداء صفاته ومن طاب حظه من توافيق واليه=ربّه هو القادر يزيد بثراته إن عوّدت للمال من كان بيديه=مالٍ ولا يبخل بمَدّة زكاته مالٍ على فعل المراجل يهقويه=يصير عونٍ له على واجباته وإن جاه محتاجٍ من الناس يعطيه=غني ويلحَق وفرةٍ من غناته وابنه على أحسن ما يريده يربّيه=يكف عوزه يا قدر عن حراته ودينه هو البادي على ما يسوّيه=ومن عند علاّم السراير هداته لا فايته وقتٍ ولا هو بناسيه=مع الجماعة ما تفوته صلاته أدّى الفروض الخمس مولاه هاديه=والسنة الحسنة عَمَر به حياته راضي عن الخالق تعالى ومرضيه=وعند المحن يطلب من الله نجاته أقوى قوي من لاذ بحماه يحميه=أكرم كريم أجزل عطاةٍ عطاته واللي ضعف دينه وفقره يلاحيه=‍دنياه توريه الجفا واجنفاته الفقر مثل الذل وا غبن راعيه=راعيه يفقد من زمانه طراته لا عاش لاشٍ برد عزمه مردّيه=خامل وبانت عند ربعه رداته دنياه كنه تيّده في تراخيه=تفوته الأيام ما أنضج شواته ما تقل به شي يريده ويبغيه=قِلّ اهتمامه حايلٍ عن هناته الملتهي بدون شيٍ يلهّيه=ما يبعد النظرات بتطلعاته يريد سيارة تجيبه وتدّيه=ويطمح لبيتٍ تعجب مواصفاته ويبي هنوفٍ في حياته تسليه=مطالبٍ يحلم بها عاسراته ودّي كسول الناس يبدأ مساعيه=وينفض عن غبار التكاسل عباته من لا عمل بأول شبابه بتاليه= أكيد ما يقدر يحقق مناته بالجهد بإذن الله يحقق مشاهيه=ومن لا اجتهد تموت فرحة خواته لو كثّر التسويف ما عاد يمديه=لا راحت الأيام راحت حلاته خصٍ لْكان الله تعالى معافيه=مفروض ينهض ما يطوّل سباته أما إن حظه في حياته مقدّيه=وإلا عدَاه اللوم بإجهاد ذاته ومعذور لا عاند زمانه تحدّيه=وأبان قدّام الخلايق ثباته بعض الشباب اليوم ما تقل يعنيه=أهله ونوماسه ومتطلباته لو شد حيله نال عزٍ يباريه=عليه تحريك السبب بخطواته أما بعضهم نال مجدٍ معليه=أخذ من المدح الحقيقي كفاته أيّ الذي يذكر عنه خاب راجيه=أو من يقال ونعم بتصرّفاته أحدٍ عليه ليا تقاعس مشاريه=وأحدٍ يقولون العرب مثل شاته قلته وغاية مقصدي بس تنبيه=للغافل اللي ما يلملم شتاته السمعة الحسنة تنومس لأهاليه=أمّه وأبوه وكل ربعه حضاته من زان حظه قامت الناس تغليه=وتزين ما بين المجالس حكاته الطيب سندا كايداتٍ مراقيه=لا هنت ياللي مطلبك طيّباته من لا يعرف الصقر بالنار يشويه=لا مدركٍ فعله ولا من هواته ومن يكسب السود الغرابيب تخزيه=وفي كسبة الوضح الغرايب قداته من خالط الأجرب يقولون يعديه=جنّب طريق اللي قليلٍ صحاته وقم للوطن قله من القلب لبّيه=لازم تعد نفسك من أوّل حماته في كل ما تملك وبالروح تفديه=وتذل شينين النوايا عداته وإن جت بتطويره تشارك وتبنيه=ويصير لك بصمه على منجزاته رجلٍ بلا موطن غثا الوقت يغثيه=عاش الوطن ما تنجحد مكرماته الرجل لا يمكن يخلي مباديه=الدين وسلوم العرب ملزماته والوالدين أهم شيٍ يبدّيه=وأمورٍ أخرى تلزمه تابعاته الضيف والجار وخويٍ يخاويه=والبر لا منّه قدر بلحماته الضيف له حق معزبه يقريه=والجار ما ينظَر على محرّماته وليا دعاه الجار أجابه ويدعيه=حلاوة المعروف بمبادلاته أما خويّه ما يغثه ويوذيه=لا شاف باله ضاق دوّر فضاته والصدق ما يثني عزايم هقاويه=يعيش من حطه سمه من سماته وهبا الكذوب اللي بكذبه تباهيه=ما يصدّقون المجتمع بكلماته وأدّى الأمانة واجبٍ ما يخليه=وصم الجبال الشامخة رافضاته ونيتك في شي تبيعه وتشريه=خلك حريص في نقاه وصفاته والزور والتزوير جنّب حراويه=وخل الشهادة صادقه من بداته ومدام جالي بالقصيدة مناويه=ذكر النساء ما يعد من عايباته تاريخهن كل أكثر الناس ترويه=الطيّبات الطيّبة مدركاته كم لطفةٍ بأمّه وأبوها تحاضيه=تحمّلت زود العنا وكلفاته والزوج ما تنكر جميله وتشقيه=وعند القصاير ما حكت في شناته وتقوم لعياله على خير توجيه=عينه على كل العيال وبناته وإن كان أمرها طاعته ما تناحيه=وليا عطاها السر تحفظ وصاته تستاهل الحشمة مدامه تداريه=ومن عند خلاقٍ الخلايق جزاته لا طاب حظ الرجل طابت ملافيه=سرج البيوت بيوتهن حافظاته أما بعضهن كود تبدي مساويه=وتبيّن أسراره على مجالساته ونظراتها بالعين على مخابيه=وليا خذا الراتب تزيد شرهاته لا صار طيّب ليتها ما تقاصيه=تهوّن عليه ولا تزيد ضهداته وكلٍ على ما يريد تمشي خطاويه=كلٍ معه وعينه مراته هذي مشاعر شاعرٍ في قوافيه=اللي طرى لي قلت يالفكر هاته قافٍ على كل المحبين نهديه=ريح الخزامى والنفل بالغاته وصلوا عدد ليلٍ ضيا الشمس قافيه=على نبيٍ بالمدينة وفاته انقاد لأمر الله وجنّب نواهيه=واطلب من المسلم يسوّي سواته

أخوكم :

زيد بن زياد المفضلي