بالجود لا تزعل ولو صار تنقيص = النقص من جود الرجال الكريمه
اللي لهم في سجل الامجاد ترخيص =ماهي علوم مجمعين النميمه
وسج القدم بأرض تحكمه براخيص= بيض الطعوس اللي تقل لون خيمه
أرضه غراز وبه طلوع وحقاريص =بين الرماح وبين طلعات شيمه
ضغط وجور والمطاليع تحويص= وصوت المكينه يزعجك من نحيمه
جزرت ضماء فيها تضيع الخواريص= كن المهندس به مسوي جريمه
يضيع عقل مرصص المال ترصيص= سلب الرجال اللي تحكمه حريمه
سوالفه كذب وتهامي وتخريص= صورة رجل والعقل مثل البهيمه
ولسانه كما المنشار يقص تقصيص= ماهو محمد تتبعه ولا كليمه
يقرص بحكيٍ يقرص القلب تقريص= يسمم عقول الطيبين السليمه
يا قيّموا فهود الرجال المشاخيص= اللي بهم عز وشهامه وشيمه
بسجلهم ماله نقاط وتخاصيص= وفعل المراجل يالسنافي تظيمه
ماهو مع اللي للمكارم قوانيص= يجبر بهم جور الليالي وظيمه
فيهم كرم حاتم ويوم المحن بيص= بمواقف تكسب وقار وقيمه
بالوذ من نوع الحديد المفاريص= حبس الظعن بالكون ذروة وريمه
ترعى بهم نبت من العشب تخصيص= عنه المطر ماوقف رذاذه وديمه
معهم توسع خاطرك بالمقانيص= والعمر يقضي والليالي مقيمه
لا بد من قبر به الطين تجصيص= حتى هبوب الريح يحرم نسيمه
والخاتمة سلمتك النص تنصيص= لجيل بعدنا والهليمه هليمه