ياسلام الله على ذيك الليالــي=يوم يسهر فرحنا والصوت عالي
وسط ربعن مابهم غير الجمايل=لارتكوله شالوا حمولن ثقالي
ونتسامر ما حدآ ضايق خويه= ونرتوي من فيض معسول الدلالي
قهوتن من ذاقها يركد مزاجه=ويتهيجن يرتقي روس المعالي
وهيلها يفوح بعطر طيب الطنايا=طيب ساس وجود طيبين الخصالي
ماحلا الفنجال في ربوع الطنايا =بمجلسن ماتقعده نفوسن ثقالي
ذا خوين ماندور عن بديله= وذا ولد عمي وهذا ولد خالي
كم خوين راح ما راحت غلاته=وكم قريبن راح مافارق خيالي
اتسلى.. وانسى لكن لاذكرته=يرتعش في داخلي صمت الليالي
يشهد الله مابكيت إلإ لفرقى=صاحبآ شد الركايب والرحالي
مايهز القلب عشق ولا محبه=غير فرقا صقر من عز الرجالي
صاحبي لادارت الدنيا وجارت=يسندن كنه من كبار الجبالي
واعرفه لاجاء طاريي يفاخر=واعرفه يكثر وينشد عن سؤالي
مانسيته وادري انه لو نساني=يذكرن لاجال في روس المفالي
يذكرن لاعدوا زحول الفعايل=ويتنومس ويتباهى في فعالي
ولا أنتي وش تبي بي ياغريبه=هو مزاجي صعب والأصعب وصالي
مالتقينا.؟ ولا الظروف مجمعتنا=وما اجتمعنا.. ولافترقنا في جدالي
وماوصلتي غايتي حتى احتفي بك=ولا هواك اللي مسبب بإنشغالي
غايتي وقمة طموحي ببدويه =تحفظن لاغبت عنها واتعنالي
احرق ضلوعي لجل أشرب وصاله=وما اهز فنجانها دامه حلالي
بنت عودآ مرتقي راس الجزيله=واخت قرم^ن^ راعي افعالن جزالي
وصفها يحتار به اصحاب القرايح=واجمعوا بأني احترفته في مقالي
لكن اني لابتديت انهي كلامي=وانتهي من قبل اكتب ماطرالي
في بهاها.. تشبه لشمس الضحويه=وفي وصوفه .. تشبه اوصاف الغزالي
وفي خدوده.. مرتسي ورد اقحواني=وفي جديله.. خيمت كل الليالي
وفي عيونه.. دربي الي مالقيته=ضعت فيها وصارت دروبي طوالي
هيه يلي فارقه عن من بجـيلك= ارحميني طالبك روفي بحالي
ماملكت بدنيتي الا غلاتك=وغربتي وصحرى صدودك والرمالي
يا تجيني تداوي جروح المحبه= أو دعيني..ودي إشد الرحالي