نفس الليالي كلها نفـس الايام=نفس الجروح ونفس وجه الليالي
ذكراك هذي توهـا،، وكـنها العـام=مرت ثلاث سنين،، وهي نفس حـالي
مـا ينفع المقهور،، لـو عـظ الأبهـام=وما يـروي المشتاق،، شـرب الزلالي
نفس التفاصيل رجعت،، نفس الأحلام=وأنا حسبت أني عن العشق سالي
ذكراك زادت لوعتي عشـق.. و..هيام=قصة غريبـه،، ترتعش في خيالي
تغيب عني عام،، وتجتاحني عام=وعامن ترووح،، وعام تجتاح بالي
يعني،،علي مكتوب أعايش أوهام=واللي صفالك بالهوا ما صفالي
من وين ماوجهت،، لك درب الاقدام=تسوقني ذكراك.. يا راس مالي
أشوف وجهك وين مارحت واعتام=في كل شي أشوف وجهك.. طرالي
اتذكرك لاشفت نظرات الايتام=وان شفت شمسن قربت للزوالي
واتذكرك لا شفت بدر الفضا نام=وأعلن رحـيلك يا صعيب المنالي
بعدين،يعني،لا متى جروحي عظام=مليت أنا و ما عاد صدري شمالي
ودي أعيش،،بديرتن ما بها اصنام=ولا اريد أوضح للملا.. ما جرالي
خلك على ماضيك والوعد قدام=وانا.. أدور حاضري.. ولا أبالي
دام الفضا واسع.. قلبي كفخ.. حام=أبسط جناحي بعز.. ويطيب فالي
مدينـتي صارت ركامات وحطام=غير الأسى والضيق مابه توالي
صدري قصيد ودفتر أشواق واقلام=وجو المشاعر عقب نومه صحالي
نفس الليالي جرحك وكنه العام=واليوم هذا العام نفس الليالي
انا على كل حال عاندت الأيام=ودي اعيش بعزتي دوم عالي
مع السلامه يا أمل كله أوهام=واذا جبرك الوقت يمي تعالي